مسکوہی وزیراعظم عمران خان نیازی امریکی سازش آنبار داسہ پدریسہ تینا جان ءِ خطرہ نا بیانیہ جوڑ کننگ ءِ، وزیرداخلہ رانا ثناء اللہ خان

اسلام آباد۔ 16 مئی (اے پی پی) وزیرداخلہ رانا ثناء اللہ خان پارینے کہ مسکوہی وزیراعظم عمران خان نیازی امریکی سازش آنبار داسہ پدریسہ تینا جون ءِ خطرہ نا بیانیہ جوڑ کننگ ءِ، گمانی خطرہ نا بابت اگہ پبی شاہدی اس مسکوہی وزیراعظم تون ارے تو اودے وزارت داخلہ تون دمدستی شیئر کے، حکومت دا باندات نا پورو جاست و پاست ءِ کرفنگ کن تیار ءِ۔ دوشنبےنادے آ تینا بیان اٹی وزیر داخلہ پارے کہ اگہ عمران نیازی خوائے تو دا باندات آ اسہ جوڈیشل کمیشن اس ہم جوڑ کننگ کیک و جوڈیشل کمیشن عمران نیازی نا تروک آ شاہدی و معلومداری تا جاچ ءِ ہلسا آجو فیصلہ تننگ کیک۔ اوپارے کہ اگہ عمران نیازی تینا جون ءِ خطرہ نا بابت معلومداری فراوان کپک تو امریکی سازش آنبار دابیانیہ ءِ ہم اسہ پولیٹیکل سٹنٹ اس ہی تکنگک۔ اوپارے کہ اسہ مسکوہی وزیراعظم اسے نا تینا جون نا خطرہ ءِ پولیٹیکل سٹنٹ نا وڑاٹ پیش کننگ بے کچ است ہسونی اسے و خطرہ نا سوب مننگ کیک۔ اومشورہ تس کہ عمران نیازی تینا سیکورٹی ءِ سیاسی پروپیگنڈا نا وڑاٹ پیش کپ، شاہدی ارے تو نن تون شیئر کے۔