اسلام آباد۔ 16 مئی (اے پی پی) قومی ادارہ جان جوڑی ملک انا چندی بشخ آتیٹی زیات درجہ حرارت نا ساڑی آ ریسہ نا رداٹ ہیٹ/سن سٹروک (لو لگنگ)نا بابت ایڈوائزری (پارت ) جاری کرینے۔ دا ایڈوائزری ہیٹ/سن سٹروک نا توننگ نا بابت وخت آ و جوان گام گیج آتیکن جان جوڑی نا تعلقدار ادارہ غاتے جاری کننگانے۔ ایڈوائزری نا رداٹ ہیٹ سٹروک نا نشانی تیٹی باسن و خشک جلد، نزوری یا سستی، اِل، کاٹم نا خل، و است انا دھڑکن نا ترند مننگ اوار ءِ۔ ہیٹ سٹروک اسہ ہندن ءُ طبی حالیت اسے ہرانا وخت آ جوان درمان کننگپ تو دا جان لیوا مننگ کیک، داڑآن عزوہ غاتے نسخان رسینگ کیک و دا معذوری نا سوب جوڑ مننگ کیک۔ چنکا چنا، 65 سال آن زیات وئی نا بندغ، شوگرو ہائی بلڈ پریشر نا ناجوڑ، ایتھلیٹس و آؤٹ ڈور کاریم کروک آ ورکرآتے ہیٹ سٹروک نا زیات خطر ہ مریک ۔ ایڈوائزری ٹی مندرجہ ذیل رکھی گام گیج آتیا زور شاغنگانے۔ باسن آ موسم اٹ زیات دِیر کنبو، زیات درجہ حرارت والا جاگہ غاتیا براہ راست دے انا روشنائی ٹی ہِننگ آن پاناد کبو، باسن آ موسم اٹی کاٹم ءِ ڈکھبو، و ہلکا ءُ رنگ انا پچ بینبو، براہ راست دے انا روشنائی ٹی کاریم کروک آ بندغ آک وافر کچ اٹ دیر/شربت ءِ کاریم اٹ اتنگے۔ پین معلومداری کن دا ایڈوائزری قومی ادارہ جان جوڑی نا ویب سائٹ(www.nih.org.pk) آ ساڑی ءِ۔
