اسلام آباد۔15مئی (اے پی پی): بنجاھی وزیر اھوالکاری ءُ شنگ کاری مریم اورنگزیب ءَ شمالی وزیرستان ءِ دمگ میرانشاہ ءَ بوھوکیں وت کشیں تراک ءَ را مذمت گران ءَ گوشتگ کہ ناشرکار آں ایمنی ءَ را ھلاس کنگ لوٹاں، اے رنگیں لگوریں کاروائی ءَ چہ مئے دلبڈی ڈگار ءَ کپت نہ کناں۔ یک شمبے ءِ روچ ءَ وتی یک بیانے ءِ تہ ءَ آئی ءَ گوشت کہ ملک ءَ ایمنی ءِ برجائی ءِ واستہ سیکورٹی ءِ کارندہ آنی قربانی مپت ءَ نہ روت۔ بنجاھی وزیر اھوالکاری ءَ تراک ءَ سیکورٹی کارندہ ءُ زھگ آنی شہید بوھگ ءِ پد ءَ دلپدردی ءِ درشان کت ءُ شہید آنی درجگ آنی برز ءُ بلندی ءِ واستہ دعا ءِ نیک ھم کت۔
