اسلام آباد۔ 14 مئی (اے پی پی) وزیراعظم شہباز شریف یواے ای نا صدر شیخ خلیفہ بن زید النہیان نا کزیت آ ہڑزخواہی کن متحدہ عرب امارات آ کاہک ، وزیراعظم اینو(ہفتہ نادے آ) لندن آن متحدہ عرب امارات آ کاہک، ہراڑے یک شنبے نادے آ یواے ای نا ولی عہد شیخ محمد بن زید النہیان تون ایماندار صدر نا کزیت آ ہڑزخواہی کیک۔ ہفتہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم شہباز شریف یواے ای نا سرکڑدہ و الس تون است ہسونی نا درشانی ءِ کیک۔ پاکستان نا عظیم سنگت شیخ زید نا کزیت آن پد شیخ خلیفہ بن زید تینا باوہ نا مشن ءِ قابلیت اٹ مون آ درے۔ وزیراعظم شہباز شریف ہڑزخواہی کلہو اٹی پارے کہ شیخ زید یواے ای نا فیڈریشن نا بنداو ءِ تخاسس، شیخ خلیفہ اودے پین سوگو کرے و بے مٹ شون تس، پنجاسال انا پدریسہ خواری آن شیخ خلیفہ یواے ای کن تینا باوہ نا شونداری وژن ءِ پوسکن آ بڑزی تیا درے، شیخ خلیفہ ایماندار تینا دورہ اٹی سلابت ءِ تینا واک کرے، او الس تون رابطہ ٹی مسکہ۔ وزیراعظم ہڑزخواہی کلہو اٹی پارے کہ او بڑزکو تعلیم یافتہ و زیرک ءُ شخصیت اس ئس ہرا تینا اقتدار ءِ ملک و الس نا خذمت کن وقف تخا، شیخ زید آنبار شیخ خلیفہ بن زید النہیان نا کزیت امت مسلمہ نا اسہ بھلو نسخان اسے، وزیراعظم ایماندار نا درجہ غاتا بڑزی و یواے ای نا حکومت و الس کن صبر وجمیل نا دعاکرے۔
