اسلام آباد۔ 14 مئی (اے پی پی) صدر مملکت ڈاکٹرعارف علوی ملک انا ترند رفتار شونداری کن انفارمیشن ٹیکنالوجی ءِ کاریم اٹ اتنگ نا گرج آ زور شاغسا پارینے کہ آئی ٹی نا بشخ ءِ اولیت ترسا پاکستان کم وخت اٹی شونداری نا مزل آتے طے کننگ کیک، آئی ٹی نا بشخ انا ملکی زرگزران نا شونداری و مخلوق ءِ روزگار نا فراوانی ٹی نمان کڑد اسے۔ داخیال آتا درشانی ءِ او ہفتہ نادے آ داڑے فاطمہ جناح پارک اٹی ’’فیوچر فری لانس فیسٹ 2022‘‘ آن تران کرسا کرے ہرانا بست وبند ءِ جے ایس بینک پاکستان فری لانس ایسوسی ایشن و ایلو ادارہ غاتا شریداری اٹ کریسس۔ دود اٹی اسپیشل ٹیکنالوجی زون اتھارٹی نا چیئرمین عامر ہاشمی و جے ایس بینک انا عمران حلیم شیخ تون اوار چندی ادارہ غاتا سی ای او و آئی ٹی نا چاہندارآک بشخ ہلکر۔ صدر مملکت پارے کہ ورناتا جوزہ و انفارمیشن ٹیکنالوجی نا شونداری پاکستان ءِ شون ہلوک ملک ا س جوڑ کیک، آئی ٹی وایلو بشخ آتیٹی شونداری آن پاکستان نا آخبت روشنا مریک۔ اوپارے کہ آئی ٹی انڈسٹری ءِ تربیت یافتہ افرادی قوت نا گرج ءِ، پاکستان اٹی ہیومن ریسورس نا کمتی اف، ورناتے ساڑی آ دورانا خوات آتا رداٹ انفارمیشن ٹیکنالوجی ٹی تربیت یافتہ جوڑ کرسا اوفتے کن روزگار نا وارخواہی ودک۔ اوپارے کہ آئی ٹی ٹی مون آ ہِننگ کن پبی کاریم کروئی مریک۔ ورناتا فنی تربیت کن سکل ڈویلپمنٹ پروگرام بناکننگانے ہرانا مسخت ورناتے کسبکار و زرگزرانی وڑاٹ خودکفیل کننگ ءِ۔ صدر مملکت پارے کہ ورناتے ڈیجیٹل سکلز نا کنڈآ چکنگ انگ ءِ، شش تُو اٹی 22 لکھ بندغ آتے ڈیجیٹل اسکل آتا تربیت تننگا، ڈیجیٹل مہارت آتا کورس انا تربیت یافتہ و مر مر انگا علاقہ غاتیان تعلق تخوک آ گڑاس ورنا یک و نیم لکھ ڈالر اسکان کٹیا کننگ ءُ ہرا اسہ بھلو پیش رفت اسے۔ داکان مست صدر مملکت چندی بشخ آتیٹی نمان کارکڑد نا درشانی ءِ کروک آتیٹی ایوارڈ بشخا۔
