اسلام آباد۔ 14 مئی (اے پی پی) وزیر خارجہ بلاول بھٹو زرداری پارینے کہ کراچی ٹی دہشت گردی نا واقعہ ٹی اوار بندغ آتے سخت سزا تننگک، چینی باتیک ننا مہمانک ءُ اوفتا رکھ ننا زمواری ءِ، پاکستان و چین مدام غٹ چیلنج آتا اواری اٹ مقابلہ ءِ کرینو۔ داخیال آتا درشانی ءِ او ہفتہ نادے آ داڑے وزارت خارجہ ٹی کراچی ٹی دہشت گردی نا گواچی مروک آ چینی باتی تا یات اٹی اڈ ہلوک دود آن تران کرسا کرے۔ وزیرخارجہ پارے کہ اینو دہشت گردی نا گواچی مروک آ چینی باتی تا یات اٹی وزارت خارجہ ٹی یکجا مسنو، چینی استاد آک پاکستانی طالب علم آتے چینی بولی ءِ ہیل تسرہ ، نن کراچی ٹی دہشت گردی نا واقعہ نا ترندی اٹ مذمت ءِ کینہ۔ بلاول بھٹو زرداری پارے کہ کراچی ٹی دہشت گردی نا واقعہ ٹی اوار بندغ آتے سخت سزا تننگک، چینی باتیک ننا مہمانک ءُ اوفتا رکھ ننا زمواری ءِ، پاکستان و چین مدام غٹ چیلنج آتا اواری اٹ مقابلہ ءِ کرینو۔ اوپارے کہ پاکستان نا صحافی و الس ءِ ہم خصوصی کلہواس سرکننگ خواوہ، پاکستان وچین نا سنگتی آن غٹ بلد ءُ، پاکستان و چین نا سنگتی نئے بیرہ ہڑتوم آ ملک بلکن الس نا نیام اٹ ہم ارے۔ داسنگتی ءِ برجاتخنگ اٹ شہید ذوالفقار علی بھٹو ، شہید بینظیر بھٹو وآصف علی زرداری نا کڑڈ غٹ انا مون آٹے۔ وزیرخارجہ بلاول بھٹو زرداری پارے کہ چینی باتی تے دہشت گردی نا واقعہ سندھ انا دارالحکومت کراچی ٹی پیش بسنے۔ اسہ پاکستانی اس ہم داسگنگ کپک کہ ننا مہمان تے داوڑنا دہشت گردی نا واقعہ پیش برے۔ اوپارے کہ مچ آ دنیا ٹی پاکستانی تا مہمانداری نا درور ساڑی ءِ۔
