اسلام آباد۔ 14 مئی (اے پی پی) چیئرمین سینیٹ محمد صاد ق سنجرانی پارلیمانی ڈل اتون اوار اسلام آباد اٹی یواے ای نا سفار خانہ غا ہنسا متحدہ عرب امارات نا صدر شیخ خلیفہ بن زاید النہیان نا کزیت آ ہڑزخواہی کرے۔ چیئرمین سینیٹ ہڑزخواہی کتاب اٹی تینا تاثر آتے نوشتہ کرے۔ اوپارے کہ شیخ خلیفہ بن زاید النہیان نا کزیت نئے بیرہ یواے ای نا الس کن بھلو نسخان اسے بلکن پاکستانی و امت مسلمہ کن ہم بھلو صدمہ اسے۔ اونا کزیت آن پاکستان اسہ سُچا و مخلص دوست اسے آن محروم مسنے۔ انسانیت و مسلم امہ نا شونداری و شونہالی کن شیخ خلیفہ بن زاید النہیان آتے مدام یات تخنگک۔ چیئرمین سینیٹ پارے کہ او یواے ای نا حکومت و الس نا ڈکھ اٹی بریبر نا شریک ءِ۔ چیئرمین سینیٹ دعاکرے کہ اللہ تعالیٰ ایماندار ءِ جنت الفردوس اٹی بڑزکو ہند اس عطاکے۔ چیئرمین سینیٹ محمد صادق سنجرانی تون اوار پارلیمانی ڈل اٹی ڈپٹی چیئرمین سینیٹ مرزامحمد آفریدی، قائد حزب اختلاف سینیٹ ڈاکٹر شہزاد وسیم، سینیٹرز پرنس احمد عمرزئی، مولانا عبدالغفور حیدری، عبدالقادر، دوست محمد، نصیب اللہ بازئی ئسک اوار ئسر۔ پارلیمانی ڈل شیخ خلیفہ بن زاید النہیان نا بخشش و درجہ غاتا بڑزی کن دعا کرے۔

متعلقہ مضامینمصنف کی طرف سے مزید