اقوام متحدہ۔ 14 مئی (اے پی پی) اقوام متحدہ پاکستان نا کنڈآن آجوئی سلاہ درشانی نا رکھ اکن غلط و ریفوک معلومداری تا توننگ نا خواست آ مبنی 2 قرارداد آتے منظور کرے ہرا سفارتی پڑآ پاکستان نا اسہ پین سرسہبی اسے۔ پاکستان بطور جی 77 چیئرمین اقوام متحدہ نا ڈیپارٹمنٹ آف گلوبل کمیونیکیشن نا کمیٹی آن انفارمیشن نا 44 می دیوان اٹی غلط و ریفوک آ معلومداری تا توننگ نا خواست آ مبنی 2 قرارداد پیش کرے ہرافتے منظور کننگا۔ دا قرارداد آتے اقوام متحدہ ٹی پاکستان مشن نا پریس قونصلر مریم شیخ نا کنڈآن پیش کننگا ۔ قرارداد آتا مسودہ ءِ مالٹا نا ڈیلیگیٹ ڈیرین کیمیلری درستی راستی کرفے ہرافتے اقوام متحدہ نا جنرل اسمبلی نا منظوری کن گدریفنگک۔ قرارداد آتیٹی خواست کننگاکہ غلط و سٹی آ معلومداری تا توننگ کن راستکی تیا مبنی معلومداری تا آجو بہاؤ، صحافی تا کارکڑد ءِ گچین و آجو کننگ، اوفتا برخلاف جلہو آتا مذمت و پدتموک ملک آتیٹی مواصلات نا پنجر و لائخی تیٹی امداد ءِ ودفنگ نا گرج آ زور شاغنگا۔ اقوام متحدہ ٹی پاکستانی ڈیلیگیٹ مریم شیخ پدتموک ملک و چین آ تالان گروپ جی 77 نا کنڈآن پارے کہ قرارداد آتا مسودہ غا مذاکرات نا کمکار نا وڑاٹ بلاک ڈیپارٹمنٹ آف گلوبل کمیونیکیشن کن پوسکن آ رفتار و مخ تفی ءِ پک کننگ نا کوشست کرے۔ او ڈیلیگیٹس نا منت واری ءِ ہرفسا پارے کہ ننے یقین ءِ کہ نن دا چرجوئی ٹی اہم پیش رفت کرینن۔ پاکستانی ڈیلیگیٹ فلسطین نا دیکی کنارہ اسرائیلی فوج انا سم کاری آن الجزیرہ نا زالبول صحافی شیریں ابوعاقلہ نا خون نا مذمت ءِ کرسا جہانی برادری آ زور شاغا کہ او اسرائیلی کوزہ نا چٹفنگ کن دمدستی گام گیج کے ہرا ڈیہہ ٹی بے چیٹی و جنگ و جھیڑہ، نزوری ٹی پدریسہ ودکی و مسلم دنیا کن گڑتی نا سوب ءِ۔ اوپارے کہ دے ٹک نیامی ٹی پائیدار امن بیرہ دوریاستی ایسر و 1967 آن مست انا سیم تیا تالان اسہ قابل عمل، وتواجہ و اسرائیلی سیم تتون گنڈوک فلسطینی ریاست نا جوڑ کننگ نا کمک اٹ ہی دوئی کننگ مریک، ہرانا دارالحکومت القدس الشریف مرے۔
