اسلام آباد۔ 13 مئی (اے پی پی) بنجائی وزیر حوالکاری و شینکاری مریم اورنگزیب زرگزران نا بھسکاری، ڈالر نا تاریخی بڑزی نا ڈوہدار عمران خان ءِ گوندسا پارینے کہ پاکستان ءِ گھمبیر ویل آتا مین اٹ عمران خان بٹے، اینو ڈالر نا قدر اٹی ودکی نا زموار عمران خان ءِ، ڈالر 193 روپئی آ عمران خان نا سوب آن ہنا، آئی ایم ایف معاہدہ غا عمران خان دستخط کرے ہرانا سزا الس ءِ کبینی نا دروشم اٹ ملنگ ءِ۔ جمعہ نادے آ پاکستان تحریک انصاف نا راہشون چوہدری فواد حسین نا بیان آ ردعمل نا درشانی ءِ کرسا بنجائی وزیر حوالکاری پارے کہ ملک اٹی چار سال نالائخ ، نابود ، کارٹلز و عمران مافیا نا حکومت نا سوب آن زرگزرانی دہشت گردی کننگا، اینو ملک اٹ زرگزرانی نزوری عمران صاحب نا سوب آن ءِ، پیٹرول نا مد اٹی عمران خان تینا بے سہب سیاست ءِ بچفنگ کن ناقابل تلافی نسخان کرے ہرانا بھرم ءِ اینو الس ءِ کنوئی تمنگ ءِ۔ اوپارے کہ اینو مشکل فیصلہ کننگ انگ ءِ تو دانا زموار عمران خان ءِ، تینا الس دشمن زرگزرانی ڈوہ تے ڈکھنگ کن عمران خان کنیٹر آ لگانے۔ مریم اورنگزیب پارے کہ عمران صاحب سیاسی مسخت آتیکن ملک انا زرگزران و الس ءِ گہیو تخنگ غداری اس مریک، نی الس ءِ کبینی تسوس، داسہ غٹ آن زیات تینٹ کبینی کن شور کننگ ءِ۔ اوپارے کہ عمران خان شورکپہ، کبینی نا ورندی و زرگزرانی بھسکاری نا حساب ءِ ایتے۔
