ملتان۔ 13 مئی (اے پی پی) وزیر مملکت امور داخلہ عبدالرحمان خان کانجو پارینے کہ لانگ مارچ پاکستان تحریک انصاف نا جمہوری حق ءِ ولے ملک اٹی امن و ایمنی نا حالیت آتے خراب کننگ نا موکل تفنگک۔ لانگ مارچ اسہ جوان ءُ سرگرمی اسے ہرا پارٹی ءِ متحرک تخک۔ داخیال آتا درشانی ءِ او پنچ شنبے نانن تینا اعزاز اٹی تروک آ سُوارہ ٹی میڈیا تون گپ وتران اٹی کرے۔ وزیر مملکت مستی پارے کہ پی ٹی آئی خاص ءُ جاگہ سے آ مارچ کننگ کیک ہراڑے او شش تُو یا اسہ سال اس تولنگ کیک۔ اوپارے کہ مخلوق ءِ پرتشدد مارچ انا کنڈآ دپ، سیاست کے ولے سیاست ءِ داتسکان دپ۔ اسہ سوج اسے نا ورندی ٹی اوپارے کہ الیکٹرانک ووٹنگ مشین ءِ کاریم اٹ اتوک آ ملک آک دُوارہ مینوئل وڑآ پدی بننگ ءُ۔ نن آرٹی ایس نا زہمی تیٹی اوار اُن۔ اوپارے کہ اوورسیز آتے وونٹ انا حق تفننگ غلطی اسے ولے داڑکن وڑوڈول اس مون آ اتنگے۔ وزیر مملکت پارے کہ گچین کاری اصلاحات ہی جمہوریت و ملکی ادارہ غاتا بنداو مریک۔ اوپارے کہ ساڑی حکومت خواہک کہ زوت آن زوت گچین کاری اصلاحات نا کاریم پورو مرے و نن فی الفور پوسکن آ گچین کاری تا کنڈآ کان۔ اوپارے کہ پی ٹی آئی ءِ ادارہ غاتیکن مشکل ودی کننگ نا موکل تفننگک۔ ساڑی حکومت کانود نا رداٹ سختی اٹ کاریم کیک۔ حکومت ءِ پی ٹی آئی نا لانگ مارچ نا ہچ ءُ فکر اس اف۔ ملک انا نزور زرگزرانی حالیت نا بارواٹ سوج انا ورندی ٹی عبدالرحمان کانجو پارے کہ حکومت زرگزران ءِ سوگو کننگ کن سنبرینگوک ءِ۔ ساڑی حکومت ملک ءِ زرگزرانی تنکی آن کشنگ کن المی گام گیج کیک۔ بروک آ پنچ سال ہم ننا حکومت مریک۔ السی ویل آتا ایسر اولیت آتیٹی اوار ءِ ہراڑکن غٹ وسیلہ غاتے کاریم اٹ اتنگ انگ ءِ۔ نواز شریف نا بابت سوج انا ورندی ءِ ترسا اوپارے کہ نواز شریف دا ملک انا مسہ وار وزیراعظم رہینگانے۔ او غت تر تنکی تتون مون تسنے۔ اونا وژن آن فائدہ ہرفسا ملک ءِ تنکی تیان کشنگ مریک۔ اوپارے کہ ساڑی حالیت آتیٹی پیٹرول نا نہاد ءِ سوگو تخنگ مشکل ءِ، داسہ اقتصادیات نا جنگ ءِ۔ عبدالرحمان کانجو پارے کہ ایف آئی اے سیاسی مخالف آتے شست کپک بلکن کانود نا رداٹ کاریم کیک۔ اوپارے کہ ایف آئی اے 20 بندغ آتا پدرند ءِ خلکونے ہرا 72000 سوشل میڈیا اکاؤنٹ چلیفنگ ءُ۔ اسہ سوج اسے نا ورندی ٹی اوپارے کہ مخلوق تکنگ ءِ کہ اینو نن سوغند ہرفینہ و پگہ کبینی کنٹرول مریک، الس نا اومیت آک سہی ءُ ولے ساڑی حکومت کن بھلو امتحان اسے ۔ تدوک آ چار سال اٹی پنجاب اٹی السی راجی آسودہی کن ہچ ءُ گام گیج اس کننگتو ہرانا سوب عثمان بزدار ءِ۔
