اسلام آباد۔ 13 مئی (اے پی پی) وزیر مملکت توانائی مصدق مسعود ملک پارینے کہ روس آن تیل انا ہلنگ نا تدوک آ حکومت نا ہچ ءُ معاہدہ اس ساڑی اف، دا بابت اگہ سرجم اس دوئی مس تو ایوان ءِ معلومدار کننگک، تدوک آ حکومت گیس انا پوسکن آ اسکیم تیا پابندی خلکوسس، داپابندی ءِ ہرفنگ کن دا باندات ءِ کابینہ غا دینہ، گلیات و ایلو ادارہ غاتے گیس انا فراوانی کن 2017ء ٹی بنجائی حکومت تینا بشخ انا زر تسوسس ولے تدوک آ حکومت مسہ سال اٹی دا ڈٹ ءِ بند کرے۔ جمعہ نادے آ قومی اسمبلی ٹی وقفہ سوج آتیٹی مصدق ملک پارے کہ ایل پی جی نا نہاد آتیٹی تدوک آ سال اٹی 73 درسد ودکی مس۔ سعودی عرب نا کمپنی آرامکو نا نہاد نا بنداو آ پاکستان اٹ ایل پی جی نا نہاد مقرر مریک۔ ہموکان نہاد آتیٹی ودکی و کمتی و روپئی نا قدر انا سوب آن شیف و بڑزی بریک۔ ڈالر نا مقابلہ ٹی روپئی نا قدر اٹی کمتی نا سوب آن اسہ ڈالر نا مقابلہ ٹی 60 روپئی آن زیات ودکی تروئی تمک۔ اگہ نن تینا زرگزران ءِ سوگو کینہ تو روپئی نا قدر ودک و ڈالر نا نہاد کم مریک۔ داڑآن ہرگڑانا نہاد کم مریک۔ پاک ایران گیس پیپ لین نا بابت اوپارے کہ جہانی واپار آ کاریم کروک آ وکیل آتیان وزارت ءِ سنبھالنگ آن مست معلومداری ہلکوسس۔ اوعندیہ تس کہ اگہ نن بارٹر سسٹم آن بیدس ایران تون واپار کینہ تو ولدا جہانی پابندی لگنگ کیک۔ جہانی پابندی روس آ لگنگ ءِ۔ دابارواٹی کانودی سلاہ ہلوئی تمک کہ دا پابندی تا اطلاق پاکستان آ داحالیت آتیٹی مننگ کیک۔ قومی اسمبلی نا باسک حسین طارق پارے کہ ہرا علاقہ غاتیان تیل وگیس پیش تمک ہموجاگہ نا ہندی مخلوق ءِ گریڈ اسٹ آن چار اسکان نا ملازمت بایدے ملے۔ وزیر مملکت مصدق ملک پارے کہ دا کمپنیک بھاز فائدہ ہرفرہ ۔ داکوڑیک پسماندہ علاقہ غاتیٹی ءُ و ہموجاگہ نا ہندی مخلوق ءِ کانود نا رداٹ اوفتا ملازمت آتیٹی بایدے حق ملے۔ اوپارے کہ روس اتون تیل انا ہلنگ نا ہچ ءُ معاہدہ اس مون آ بتنے آیا کہ روس آن رعایتی بنداو تیا تیل ہلنگ نا ہیت مروئے۔ پی ایس او تیل اڑزآن ہلنگ کن اسہ وڑوڈول اس تینکن کیک دابارواٹ سرجم آتے ہلسا ایوان ءِ تننگ مریک۔ وزیر مملکت توانائی نا مصدق مسعود ملک پارے کہ ضلع ایبٹ آباد نا چندی ہند آتے گیس انا فراوانی نا کاریم تدوک آ حکومت تورے۔ بنجا تینا بشخ انا 89 کروڑ روپئی آن زیات نا بشخ 2017 ء ٹی تسوسس۔ تدوک آ حکومت اٹ داڑآ پابندی خلنگانے دا باندات ءِ کابینہ ٹی دینہ و گیس کنکشن و اسکیم تیا خلوک پابندی تے چٹفنگ آ سجفنہ۔
