اسلام آباد۔ 12مئی (اے پی پی) وزیراعظم محمد شہباز شریف پارینے کہ طب انا بشخ اٹی خذمت آتا فراوانی ٹی نرس آتا کڑد بنداوی و کلیدی ءِ، مشکل حالیت و تکلیف اٹی اختہ ناجوڑ آتا خیالداری ٹی نرس آتا خذمت ستاکڑزک۔ نرسنگ نا بشخ اتون گنڈوک زالبول و نرینہ غاتے گچین آسراتی و معاوضہ غاتا زرتس ءِ گچین کننگ نا گرج ءِ۔ پاکستان اٹ نرسنگ نا بشخ انا حالیت آتیٹی گچینی، تعلیم و تربیت نا آب ءِ پین ودفنگ و معاوضہ غاتے جوان کننگ کن اصلاحات کینہ۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم نرس آتا جہانی دے آ تینا کلہو اٹی مچ آ دنیا ٹی نرسنگ نا بشخ اتون گنڈوک بندغ آتے خراج تحسین پیش کرسا پارے کہ انسانیت نا خذمت آتیا مچ آ دنیا خاص وڑاٹ پاکستان نا نرس آتا منت واری ءِ ہرفنہ۔ نرس انسانیت نا خذمت نا بھاز بھلو بشخ اسے، اوفتا طبی خذمت آتے امنا کینہ۔ کورونا دین اٹی نرس آک ڈاکٹر آتون اوار تینا پرواہ ءِ کپرسا قابل قدر خذمت سرتسر۔ اوپارے کہ ڈاکٹر آتون اوار اوار نرس آک ہم تینا جان تا قربانی ءِ ترسا کورونا تون مون تسر۔ ڈاکٹر و نرس آک کورونا نا مشکل آ حالیت آتیٹی تینا خانگی زند و چناتیکن وخت ءِ ہم انسانیت نا خذمت آتیا قربان کریر۔ پاکستان اٹ نرس آک شاندار خذمت سرتسنو ہرا تاریخ نا روشنا و گمرنا قابل بشخ اسے۔ جہانی ادارہ جان جوڑی نا دنیا نا 100 گچین نرس اینڈ مڈ وائف لیڈرآتا درجہ بندی ٹی 10 پاکستانی زالبول آتا سرفہرست مننگ اوفتا خذمت آتا جہانی امنائی ءِ۔ پاکستان نا نرس آک کوروناٹی درکار طبی آسراتی مفننگ آن پد ہم ناجوڑ آتا جان ءِ بچفسا انسانیت نا خذمت نا روشناءُ تاریخ اس نوشتہ کریر۔ اوپارے کہ طب انا بشخ اٹی خذمت آتا فراوانی ٹی نرس آتا کڑد بھاز اہم ءِ۔ مشکل حالیت و تکلیف اٹی اختہ ناجوڑ آتا خیالداری ٹی نرس آتا خذمت ستاکڑزک۔ نرسنگ نا بشخ اتون گنڈوک زالبول و نرینہ غاتے گچین آسراتی و معاوضہ غاتا زرتس ءِ گچین کننگ نا گرج ءِ۔ پاکستان اٹ نرس آتا بشخ انا حالیت آتیٹی گچینی، تعلیم و تربیت نا آب ءِ پین ودفنگ، معاوضہ غاتے جوان جوڑ کننگ کن اصلاحات کینہ۔ زالبول نرس خاص وڑاٹ راجی نامناسب رویہ غاتا شکار مریک ہرانا حوصلہ شکنی و دارداٹ آگاہی تالان کننگ نا گرج ءِ۔
