پاکستان آذربائیجان تون تینا خوشگوار برادرانہ تعلقداری تے قدر انا نظراٹ ہرک، اسپیکر قومی اسمبلی راجہ پرویز اشرف

اسلام آباد۔ 12 مئی (اے پی پی) اسپیکر قومی اسمبلی راجہ پرویز اشرف پارینے کہ پاکستان آذربائیجان تون تینا خوشگوار برادرانہ تعلقداری تے قدر انا نظر اٹ ہرک، پاکستان ءِ آذربائیجان تون تینا سدابہار سنگتی آ گمر ءِ ، پاکستان و آذربائیجان اٹی زرگزرانی و راجی بشخ آتیٹی ہڑتوم آ کنڈآتا کمکاری ءِ مون آ دننگ کن بھلو وارخواہی اس ساڑی ءِ۔ داخیال آتا درشانی ءِ او پاکستان اٹی تعینات آذربائیجان نا سفیر خضر فرہادوف تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی ہڑتوم آکنڈآتا تعلقداری و تین پہ تینی است خواہی نا امور آ گپ وتران کننگا داوخت آ اسپیکر قومی اسمبلی راجہ پرویز اشرف پارے کہ پاکستان آذربائیجان تون تینا خوشگوار برادرانہ تعلقداری تے قدر انا نظرا ٹ ہرک۔ پاکستان  ءِ آذربائیجان تون تینا سدابہار سنگتی آ گمر ءِ۔ ہڑتوم آ ملک آتا پارلیمان تیٹی پدریسہ رابطہ نا مون آ دننگ آن پاکستان و آذربائیجان نا نیام اٹ تعلقداری تے پین سوگو ی ملک۔ اوپارے کہ پاکستان تینا ہمسایہ و ڈیہہ ٹی غٹ ملک آتون خوشگوار تعلقداری خواہک۔ پاکستان غٹ ایسر نا چاری باندات آتے مذاکرات نا کمک اٹ ایسر کننگ آ یخین تخک۔ اوپارے کہ کشمیر نا ویل آ آذربائیجان نا کنڈآن جہانی و علاقائی فورم تیا پاکستان نا موقف نا مخ تفی ءِ پاکستان قدر انا نظراٹ ہرک۔ پاکستان و آذربائیجان اٹی زرگزرانی و راجی بشخ آتیٹی ہڑتوم آ کنڈآتا کمکاری ءِ مون آ دننگ کن بھلو وارخواہی اس ساڑی ءِ۔ راجہ پرویز اشرف پارے کہ باکو یونیورسٹی ٹی شعبہ اردو نا جوڑ کننگ ستاکڑزک۔ باکو یونیورسٹی شعبہ اردو نا جوڑ کننگ آن ہڑتوم آ ملک آتا ورناچین ءِ اسہ ایلو نا بولی، دودوربیدگ، و کلچر آن آراستہ مننگ نا موقع ملک۔ پاکستانی یونیورسٹی تیٹی آذربائیجانی بولی و اونا بارواٹ اسٹڈی کن شعبہ جات نا جوڑ کننگ ہڑتوم آ ملک آتا الس ءِ پین خڑک اتیک۔ توانائی نا بشخ اٹی بھلو وارخواہی اس ساڑی ءِ۔ ہرافتے ٹی کمکاری ءِ ودفنگ مریک، آذربائیجان اٹی اڈہلوک آ پائیکو کانفرنس اٹی پاکستانی ڈل پبی بشخ ہلیک۔ پائیکو تنظیم ممبر ملک آتے پین خڑک اتنگ اٹ اہم ءُ کڑد اس ادا کیک۔ اوڑدہی ٹی آذربائیجان نا سفیر راجہ پرویز اشرف ءِ اسپیکر قومی اسمبلی گچین مننگ آ مبارکبادی تس و پارے کہ آذربائیجان پاکستان تون تینا برادرانہ تعلقداری تے بھاز اہمیت ایتک ۔ ہڑتوم آ ملک آتا نیام اٹ سنگتی نا رشتہ ہرہنوک آ دے اتون سوگو آن سوگو مننگ ءِ، پاکستان و اونا پارلیمان نا نگور نو کاراباخ نا باندات آ مخ تفی آ منت وار اُن۔ سفیر آذربائیجان پارے کہ آذربائیجان کشمیر نا ویل آ پاکستان نا اصولی موقف ناتائید و دا ویل آ تینا مخ تفی ءِ برجاتخک، پاکستان ءِ تینا اسٹریٹجک شریدار تکک۔