اسلام آباد۔ 12 مئی (اے پی پی) آبی وسیلہ نا بنجائی وزیر سید خورشید احمد شاہ پارینے کہ 1961ء آن پد اینخو نا سال مچ آ ملک اٹی دیر انا کاختی مون تروک ءِ، اومیت ءِ 15 جون اسکان دیر انا کمتی مرمریک، پنجاب، سندھ ، بلوچستان و چولستان ءِ آئین نا رداٹ بریبری نا بنداو آ دیر ملک۔ پنچ شنبے نادے آ قومی اسمبلی ٹی دیر انا کاختی نا بابت باسک آتا کنڈآن چست کروک باندات آ پالیسی بیان اٹی اوپارے کہ نن حقیقت تون بایدے مون ایتن و جمہوری روایت آتاہم خیال ءِ تخن۔ اوپارے کہ وزیرآک، باسک آک و لیڈر شپ ایوان اٹ بایدے ساڑی مرے۔ وزیر آک ایلوکاریم تے پارلیمنٹ آن پد بایدے کیر۔ دیر انا ویل آ ہیت کرسا اوپارے کہ دیر انسان، ساہدار و کشت وکشار نا ویل ءِ، ننا آخبت ہم دیر اتون گنڈوک ءِ۔ دیر انا بھاز کمتی ءِ، داوڑنا کمتی 1961 ء ٹی بسوسس۔ او وخت آ دا مریس ءُ کمتی اس ئس ولے داوار ننے اومیت ءِ کہ 15 جون اسکان داکمتی نا مون ءِ توننگک، اگہ درجہ حرارت ہندا برقرار سلیس تو تربیلاغان گدواسکان بروک آ 15 آن 22 دے اٹی دیر سرمریک۔ کابل آن تدوک آ سال انا مقابلہ ٹی داوار 43 درسد آن کم مرسا 37 درسد دیر بننگ ءِ۔ منگلا پِرانا دیر آن پُرمریک وخت اس کہ تربیلا ٹی گلیشیئر نا دیر مننگ آن دیربریک۔ اوپارے کہ ایوان نا آبی وسیلہ نا قائمہ کمیٹی دروآن تولوک ءِ، دیر انسانی ءُ ویل اسے دااللہ نا کنڈآن ءِ، داڑآ نن بایدے دعا کین کہ اللہ داآفت آن ننے پناہ ایتے۔ اوپارے کہ پنجاب، سندھ و بلوچستان تون اوار مچ آ ملک اٹی دیر انا بھاز کمتی ءِ۔ اومیت ءِ 30 جون اسکان اللہ ننے ہنداخہ دیر ایتک کہ پوزیشن جوان مریک۔ اوباور کرفے کہ آئین نا رداٹ غٹ ءِ بریبری نا بنداو تیا دیرملک۔ اوپنجاب حکومت آن خواست کرے کہ او تینا 300 کیوسک دیر ءِ کم کرسا چولستان ءِ ایتے تو نن منت وار مرینہ۔ داکان مست اعتراضی ٹک آ مسلم لیگ (ن) نا اسمبلی نا باسک شیخ فیاض الدین پارے کہ کنا حلقہ ضلع رحیم یار خان و چولستان آ مبنی ءِ۔ داحلقہ ءِ مستین اٹ اسہ غیرکانودی گام اسے نا کمک اٹ پنجاب اٹ اوار کننگا۔ اوپارے کہ چولستان نا کرکی مخلوق المیہ نا گواچی ءِ۔ ہموڑے ساہداردیرانا سوب آن کہینگ ءُ، کنوئی ءُ دیر ہم اف ، ننا علاقہ ٹی ہژدہ لکھ مویشی ءُ، فلڈ چینل بند مننگ آن چولستان اٹی ساہدار تو ساہدار چناک ہم ملاسی آن سکنگ ءُ۔ آبپاشی کن 200 ملین کیوسک دیر ہم تننگے تو ننا ڈغارک آباد مریرہ۔ ننا اسہ لکھ 75 ہزار ایکڑ ڈغار ءِ بے آباد مننگ آن بچفنگے۔ قومی اسمبلی نا باسک کمال الدین پارے کہ بلوچستان اٹی کشارگرآتے بھاز مشکلات ءِ۔ چار سال انا جہد نا بنداوی مسخت الس ءِ آسراتی تننگ ئسک۔
