اسلام آباد۔ 12 مئی (اے پی پی) وزیر خارجہ بلاول بھٹو زرداری پارینے کہ اول گچین کاری اصلاحات مریک ولدا پوسکن آ گچین کاری مریک ، 3 اپریل آن اینو اسکان نا غیر جمہوری و غیر آئینی گام گیج آتا جاست وپاست کن پارلیمانی کمیشن اس جوڑ کننگے، مسکوہی وزیراعظم غیر جمہوری و غیر آئینی چم آتے اٹ زور شاغسا دمدستی گچین کاری یار مارشل لاء نا کسر ءِ آوار کننگ خواہک، نن ہندن ءُ شفاف گچین کاری خوانہ کہ 2018ء نا گچین کاری تیانبار کس اس اوفتیا ہور ہرفنگ کپ، الیکشن کمیشن نا پرہ غاتے گڈنگ و آرٹی ایس 2 تون اوار ایلو کانود آتے دمدستی چٹفوئی ءِ، ملک انا زرگزران ءِ سوگو کننگ، غٹ ادارہ غاتے تینا دنگ اٹ رہینگسا کاریم کننگ و جمہوریت نا سوگوی کن ننے دمدستی وڑاٹ اسہ بنداوی ضابطہ اخلاق اس شین تروئی مریک تانکہ ملک ءِ تنکی و مشکل آتیان کشنگ مرے۔ پنچ شنبے نادے آ قومی اسمبلی ٹی مسہ اپریل آن داوخت اسکان نا سیاسی تنکی آ اوپارے کہ پاکستان نا تاریخ اٹی اولیکو وار حکومت ءِ آئینی جمہوری وڑاٹ اینک کننگا۔ داحکومت نابود ئس۔ اسہ ایلو نا سیاسی حریف جماعت آتا سیاسی تاریخ ملک و قوم انا مون آٹے۔ متحدہ قومی موومنٹ و پیپلزپارٹی نا نیام اٹ سیاسی اختلاف سیاسی تاریخ نا بشخ اسے۔ بلوچستان اٹی قوم پرست جماعت آک اسہ ایلو نا سیوتی مسنو۔ داغٹ اواری اٹ حکومت نا زمواری ءِ ہرفنگ ءُ۔ ملک اٹی جنگی و ایمرجنسی حالیت ءِ، داحالیت آتیٹی سیوت قومی سیوت ہی تینا زمواری تے ہرفک۔ اینو ہر کنڈآ تنکی ءِ، نن اپوزیشن اٹ اخس مشکلات تکانہ حالیت آک ننا کساس آن ہم خراب ءُ۔ ملک تنکی ٹی تموک ءِ، جمہوریت، آئین، جمہوری و ایلو ادارہ غاتیٹی تنکی ءِ۔ ہر ادار ہ ءِ چار سال پد اسہ بندغ اسے کن متنازعہ جوڑ کننگا۔ ہِننگ تون داادا ادارہ، آئین و جمہوریت تون انتس کرینو او غٹ انا مون آٹے۔ اوننا جمہوری حق انا مقابلہ ءِ کننگ نا جاگہ غا نرسا نرسا آئین شکنی کریر، داسکان آئین شکنی کننگ ءُ۔ دا پارلیمان دا وڑنا جلہو آتے امر گوجالنگ کیک۔ اوپارے کہ آئین ءِ لتاڑنگا و داسکان دا جلہو برجاءِ۔ داایوان اوفتا جاست وپاست کن بڑزکو کہول انا پارلیمانی کمیٹی اس جوڑ کے ہرا مسہ اپریل ، 9 و 10 اپریل، پنجاب وبنجاٹی داوخت اسکان مروک آ واقعہ غاتا جاست وپاست ءِ کے۔ اسہ کمیٹی اس جوڑ کرسا دا جاست وپاست کرفنگے کہ دیردیر دا غیر جمہوری، غیر آئینی کاریم تیٹی شریک ءُ۔ مسہ اپریل نا گام ءِ عدالت عظمیٰ غیرآئینی گوندا۔ پاکستان نا الس احتساب خواہک۔ اگہ دا ایوان نا شرف نا بحالی ءِ خوارہ تو زموار آتا برخلاف جوان کارروائی کننگے۔ بلاول بھٹو زرداری پارے کہ مسکوہی وزیراعظم تینے مقدس ءُ ڈگی اس تکک۔ او ہندن جلہو کننگ ءِ ہرا قومی فائدہ، آئین نا برخلاف ءِ۔ سیاسی نزوری آن زرگزران بھس مریک۔ اوتینے داخاطرآن مقدس تکک انتئے کہ اونا برخلاف اینو اسکان اونا آئین شکنی نا برخلاف کارروائی کننگتنے۔ اوتینا دوراٹی تنکی ودی کرے۔ بلاول بھٹو زرداری پارے کہ سندھ چولستان اٹی دیر انا تنکی ءِ، خولم، فوڈ سیکورٹی نا تنکی دارجیم چیلنج آن مست انا ءِ۔ اوپارے کہ روس یوکرائن نا سوب آن خولم نا ہلنگ اٹ پین ویل مریک، مہالو آن کورونا وایلو سوب آتا سوب آن فوڈ سیکورٹی نا باندات ءِ۔ مسکوہی وزیراعظم ءِ کس اس خوانوک ءُ اف۔ ایوان فی الفور کمیشن اس جوڑ کرسا جاست وپاست کے۔ مسہ سال آن کرپشن کرپشن، دُز دُز نا دوبہ غاتے بنسا خف تیان کر مسن۔ چارسال اقتدار اٹی رہینگ انگ آن پد ہم ہچ ءُ دُز اس ہلتو بلکن تینٹ دُز پیش تما۔ وزیراعظم و خاتون اول نا دامون ایمون ساڑی مخلوق چارسال اٹی ارب پتی جوڑ مسر۔ دادولت اٹ ودکی امر مس۔
