اسلام آباد۔ 12 مئی (اے پی پی) قومی اسمبلی اسہ امنائی قرارداد اسے نا منظوری ءِ تسنے ہراٹی مقبوضہ جموں وکشمیر اٹی گچین کاری حد بندی کمیشن رپورٹ ءِ مسترد کرسا ترند انگا لوز آتیٹی مذمت ءِ کننگانے و پاننگانے کہ دا حد بندی تا نتیجہ ٹی اسہ گچین کاری اس ہم اقوام متحدہ نا بست وبند اٹی آجو و غیر جانبدارانہ استصواب رائے نا گیگ بدل مننگ کپک، پاکستان کشمیری تا حق خودارادیت نا دوئی کننگ کن ہرممکن کوشست آتے برجاتخک، حکومت آ زور شاغنگانے کہ کشمیری تا برخلاف بھارتی گام گیج ءِ پرزور وڑاٹ اقوام متحدہ ، او آئی سی تون اوار جہانی برادری نا مون آ بے نقاب کے۔ پنچ شنبے نادے آ قومی اسمبلی ٹی وزیرخارجہ بلاول بھٹو زرداری قرارداد پیش کرسا پارے کہ دا ایوان بھارت نا کنڈآن حدبندی کمیشن نا کمک اٹ کروک آ جغرافیائی بدلی تا ترند انگا لوز آتیٹی مذمت ءِ کیک۔ قرارداد اٹی پاننگاکہ دا گام انا مسخت مصنوعی وڑاٹ مسلمان آبادی نا گیشتری ءِ بدل کننگ ءِ۔ اوپارے کہ دا کمیشن نا سلاہ تے بھارتی مقبوضہ جموں و کشمیر اٹی غٹ سیاسی جماعت آک مسترد کرینو و نن ہم دا قرارداد نا کمک اٹ دا پن انا حد بندی کمیشن رپورٹ ءِ مسترد کینہ ہرانا مسخت کشمیری الس نا گچین کننگ نا لائخی ءِ کم کننگ ءِ وبی جے پی نا سیاسی و مسخت آتے مون آ دننگ ءِ۔ قرارداد اٹی مستی پاننگا کہ دا حد بندی اسکیم نا رداٹ بھارت تینا پنچ اگست 2019 ء و اوکان پد کروک آ گام گیج آتے پین سوگوی تننگ نا کوشست کرینے۔ قرارداد اٹی یات دہانی کرفنگاکہ مقبوضہ جموں و کشمیر اسہ جہانی مسلمہ جھیڑہ اسے و اقوام متحدہ نا سلامتی کونسل نا ایجنڈاغا بھلو وخت اسے آن زیر التواءِ۔ قرارداد اٹی پاننگاکہ دا حد بندی تا نتیجہ ٹی اسہ گچین کاری اس ہم اقوام متحدہ نا بست وبند اٹی آجو و غیر جانبدارانہ استصواب رائے نا گیگ بدل مننگ کپک۔ قرارداد اٹی خواست کننگاکہ بھارت جہانی کانود، سلامتی کونسل نا قرارداد و فورتھ جنیوا کنونشن نا رداٹ جہانی کانود نا پابندی ءِ کے و کشمیری تتون کروک آ قول آتے پورو کے۔ قرارداد اٹی جہانی برادری آن خواست کننگاکہ او بھارت نا کنڈآن برجا انسانی حق انا خلاف ورزی و جنگی ڈوہ آ بھارت نا محاسبہ ءِ کے۔ قرارداد اٹی داہیت انا درشانی ءِ کننگاکہ پاکستان کشمیری تا حق خودارادیت نا دوئی کننگ کن ہرممکن کوشست برجاتخک۔ قومی اسمبلی نا کنڈآن قرارداد اٹی حکومت آ زور شاغنگاکہ او مقبوضہ کشمیر نا الس نا برخلاف بھارتی گام گیج آتے پرزور وڑاٹ اقوام متحدہ، او آئی سی تون اوار جہانی برادری نا مون آ بے نقاب کے۔ داکان مست مقبوضہ جموں و کشمیر نا حالیت آتیا تینا پالیسی بیان اٹی وزیر خارجہ بلاول بھٹو زرداری مقبوضہ جموں و کشمیر نا جغرافیائی حیثیت ءِ بدل کننگ نا بابت بھارت نا کنڈآن پنچ اگست 2019 ء نا گام گیج آتیا قومی اسمبلی ٹی تینا پالیسی بیان اٹی پارے کہ بھارت نا 5 اگست 2019 ء نا گام ءِ مقبوضہ جموں وکشمیر و آزاد کشمیر نا الس تون اوار پاکستان مسترد کرینے۔
