دریائے سندھ ءَ آپ ءِ کمیگ  60 درسد  ءِ کساس ءَ سر بوتگ، آپ ءِ بچت ءُ جوانیں  بھر ءُ بانگ ءَ را دل یکیمی جوڑ کنگی انت، بنجاھی وزیر برائے موسمی مٹ ءُ بدلی  شیری رحمان  

اسلام آباد۔11مئی  (اے پی پی): بنجاھی وزیر برائے موسمی مٹ ءُ بدلی سینیٹر شیری رحمان ءَ سندھ ءَ آپ ءِ  ڈکال ءِ ھوالگ ءَ نہ وشی ءِ درشان کنان ءَ گوشت کہ دریائے سندھ ءَ آپ  ءِ  60 درسد کمی ٹوھیں بیمی ھال ات، آپ ءِ بچت ءُ جوانیں بھر ءُ بانگ  ءَ را دل یکیمی جوڑ کنگ بہ بیت۔ چار شمبے  ءَ وزارت ءِ موسمی مٹ ءُ بدلی ءِ نیمگ ءَ جاڑی بوتگیں بیان ءِ رد  ءَ بنجاھی وزیر ءَ گوشت کہ سندھ ءِ  آپ ریچیں بیراج ءُ  شت آنی تہ ءَ آپ ءِ 52 ءَ بگر تاں 62 درسد کمی ءِ سبب ءَ  آباتی، کشت ءُ کشار ءُ دلوت آناں آپ ءِ  سک باز ضلورت  انت۔ دریائے سندھ ءَ آپ ءِ  ڈکال ءِ سبب  ءَ  سندھ ءِ بازیں شہر  آنی تہ ءَ آپ نہ رسگ ءَ انت۔  شیرید رحمان ءَ گوشت کہ اے وھد ءَ  کوٹری ڈائون  اسٹریم ءَ 15 ہزار کیوسک آپ بہ بوت انت بلے 2 ہزار کیوسک  ءَ چہ کم یل کنگ بوھگ ءَ انت،   آپ ءِ کمیگ ءِ سبب ءَ سندھ ءَ کپاس، چاول ءُ ایندگر کشار  تباہ بوھگ ءَ انت۔ آ ئی ءَ گوشت کہ ہیٹ ویو  ءُ باز گیشیں گرمی ءِ موسم  ءَ سندھ ءُ  زرباری  پنجاپ ءِ دمگ آنی تہ ءَ  پ ءِ  کمیگ  باز نہ وشیں گپ ات۔  یونائیٹڈ نیشن ءِ رد ءَ 2025 ءَ تاں پاکستان  ڈکال ءِ آماچ بیت۔ شیری رحمان ءَ گوشت کہ آپ ءِ  1991 ءِ آپ ءِ منوگری ءِ رد ءَ جوانیں رنگ ءَ بھر ءُ بانگ المی انت، مارا آپ ءِ بچت ءُ صوبگ آنی نیام ءَ جوانیں بھر ءُ بانگ  کنگی انت۔