ملک ءِ تہاری آن کشنگ و صنعتی شونداری کن بجلی نا پیدواری ڈٹ آتے ترندی اٹ پورو کننگ نا گرج ءِ، بنجائی وزیر آبی وسیلہ سید خورشید شاہ نا واپڈا نا کنڈآن چندی ڈٹ آتا بارواٹ حوال اٹی گپ وتران

اسلام آباد۔ 11 مئی (اے پی پی) بنجائی وزیر آبی وسیلہ سید خورشید احمد شاہ پارینے کہ ملک ءِ تہاری آن کشنگ و صنعتی شونداری کن بجلی ناپیدواری ڈٹ آتے ترندی اٹ پورو کننگ نا گرج ءِ، ڈیم تا تفنگ آن نئے بیرہ بجلی نا پیدوار اٹی ودکی مریک بلکن گچین آبپاشی نا کمک اٹ نن کشاری پیدوار اٹی ہم ودکی کننگ کینہ۔ اوداخیال آتا درشانی ءِ چارشنبےنادے آ داڑے واپڈا نا کنڈآن چندی ڈٹ آتا بارواٹ حوال اٹی کرے۔ سید خورشید احمد شاہ پارے کہ بجلی نا پیدواری ڈٹ آتے ترندی اٹ پورو کننگ نا گرج ءِ تانکہ نئے بیرہ ملک ءِ تہاری تیان کشنگے بلکن ترند رفتار صنعتی شونداری ءِ ہم ممکن کننگ مرے۔ اوپارے کہ فنڈ آتا دوئی آن پد ہم بجلی نا ڈٹ آتیا کاریم نا سست روی ستاکڑزنگ نا قابل اف۔ اوپارے کہ بجلی نا ڈٹ آتیا ترندی اٹ کاریم کننگ نا گرج ءِ و دا ڈٹ آتیٹی ڈیوالئی ملک و قوم انا فائدہ ٹی اف۔ اوپارے کہ نن غٹ اسہ ٹیم اسے نا وڑاٹ کاریم کینہ تانکہ دا ڈٹ آتیان زوت و گچین ءُ بھرم اس دوئی کننگ مرے۔ خورشید شاہ پارے کہ دیامربھاشا ڈیم ، مہمند ڈیم، داسو ہائیڈرو پاور پروجیکٹ ، کرم تنگی ڈیم انا تفنگ و تربیلا ڈیم انا ودکی پروگرام آ ترندی اٹ کاریم ءِ پورو کننگ نا گرج ءِ۔ اوپارے کہ او زوت ڈیم تا دورہ ءِ کیک و شونداری کاریم تا تینٹ جاچ ءِ ہلیک۔اوپارے کہ ڈیم تا تفنگ آن نئے بیرہ بجلی نا پیدوار اٹی ودکی مریک بلکن گچین آبپاشی نا کمک اٹ نن تینا کشاری پیدوار اٹی ہم ودکی ہم کننگ کینہ۔