ہندی کہول آ السی ویل آتا ایسری کن بلدیاتی ادارہ غاتے مالی وانتظامی وڑاٹ واکدار کننگ المی ءِ، قائم مقام گورنر بلوچستان میر جان محمد جمالی

کوئٹہ۔ 11 مئی (اے پی پی) قائم مقام گورنر بلوچستان میر جان محمد جمالی پارینے کہ ہندی کہول آ السی ویل آتا ایسری کن بلدیاتی ادارہ غاتے مالی و انتظامی وڑاٹ واکدار کننگ المی ءِ، این ایف سی ایوارڈ نا وڑآ پی ایف سی ایوارڈ نا کمک اٹ بلدیاتی ادارہ غاتے مالی وسیلہ فراوان کرسا اوفتے سوگو کننگے۔ داخیال آتا درشانی ءِ او جعفرآباداٹی میڈیا نا نمائندہ غاتون گپ و تران کرسا کرے، قائم مقام گورنر بلوچستان پارے کہ انڈس ریور اتھارٹی نا معاہدہ نا رداٹ بلوچستان نا پٹ فیڈر کینال، کھیر تھر و چنکا جوتیٹی دیر انا فراوانی ءِ پک کننگے بلوچستان نا جم بشخ سندھ انا دیر انا اسہ جو اسے نا کچ ہم اف ، ہنداخاطرآن ننے اومیت ءِ سندھ اٹی دیر انا کاختی آن پد بلوچستان ءِ اونا مخصوص بشخ آب تننگک، میر جان محمد جمالی پارے کہ بلوچستان اٹی بلدیاتی گچین کاری تا سرجزآک پرامن وڑاٹ برجاءُ و تین پہ تینی ایلمی نا بے مٹ ءُ فضااس جوڑ ءِ ہنداسوب ءِ کہ اسہ جاگہ اس ہم الیکشن کمیشن آف پاکستان نا ضابطہ اخلاق ناخلاف ورزی نا عنصر نظر بفک و ترند آ باسنی آن پد ہم اومیتدار آک وونٹ ہلنگ کن الس آ ہِننگ ءُ۔ میر جان محمد جمالی پارے کہ ہراوڑ بنجانا کنڈآن نیشنل فنانس کمیشن، این ایف سی نا کمک اٹ صوبہ غاتے مالی وسیلہ فراوان کننگک ہمووڑ پراونشل فنانس کمیشن، پی ایف سی نا کمک اٹ بلدیاتی ادارہ غاتے مالی و انتظامی وڑاٹ واکدار کرسا السی ویل آتا ایسری کن سنجیدہ و پبی گما گیج کننگ المی ءِ۔