ڈیجیٹل دور اٹی الیکٹرانک منی نا کاریم اٹ اتنگ ودنگ ءِ، ہرادے رکھ کننگ نا گرج ءِ، آئی ایم ایف

اسلام آباد۔ 11 مئی (اے پی پی) جہانی مالیاتی فنڈ(آئی ایم ایف) پارینے کہ ڈیجیٹل دور اٹی الیکٹرانک منی (ای منی) نا کاریم اٹ اتنگ ودسا ہِننگ ءِ ہرادے رکھ کننگ نا گرج ءِ۔ آئی ایم ایف تینا اسہ بلاگ اسے ٹی پارینے کہ ہندن ہندن الیکٹرانک زر انا کاریم اٹ اتنگ ودسا ہِننگ ءِ دا بابت ریگولیٹر آتے صارف آتا رکھ آ خاص چکار کروئی مریک تانکہ الیکٹرانک زرتس نا نظام ءِ رکھ کننگ مرے۔ ادارہ نا پاننگ ءِ کہ ڈیجیٹل دور اٹی ای منی نا کاریم اٹ اتنگ اٹ ترندی بننگ ءِ و مرکزی بینک آتا ڈیجیٹل کرنسی تا نظام، نجی وڑاٹ جاری کروک سکہ پین پین و ای منی نا ہڑدے ئی کاریم اٹ اتنگ ہڑدے ودنگ ءِ، صارف آک تینا زرتس و وصولی وخت اس کہ حکومت آک خراج و سلوک آ پیسہ غاتا وصولی کن الیکٹرانک زرتس آن فائدہ ہرفرہ۔ آئی ایم ایف جہانی برادری آ زور شاغانے کہ الیکٹرانک پیسہ نا دے پہ دے آ تالان مروک کاروبار ءِ رکھ فراوان کننگ کن جامع حکمت عملی نا رداٹ مربوط گام گیج آتے پک کننگے تانکہ صارف آتے مالیت آتا برقی نظام نا چرجوئی ٹی رکھ فراوان کننگ مرے۔ ادارہ نا پاننگ ءِ کہ پیسہ غاتا الیکٹرانک نظام اٹی دے پہ دے شونداری گڑاس مشکل ہم ودی کننگ ءِ ہرافتے تون مون تننگ کن ریگولیٹر صارف آتا رکھ انا گچین نظام ءِ پک کیر۔