مسلم لیگ (ن) بروک آ لس گچین کاری تیٹی پنجاب آن کلین سویپ کیک، رانا ثناء اللہ خان

فیصل آباد۔ 10 مئی (اے پی پی) بنجائی وزیر داخلہ رانا ثناء اللہ پارینے کہ مسلم لیگ (ن) حقی وڑ تیٹی الس نا خادم و نمائندہ جماعت ءِ، ہراہردور اٹی تینا ورکرآتے شرف تس و ہموفتا مینڈیٹ آن اقتدار نا ایوان تسکان سرمس وخت اس کہ بروک آ لس گچین کاری تیٹی اسہ وار ولدا مسلم لیگ (ن) پنجاب آن کلین سویپ کیک و نن الس نا پت اٹ لس گچین کاری تیان پد اقتدار اٹی برسا مستین آنبار ملکی شونداری و شونہالی و السی آسودہی  وشونہالی نا بھلا بھلا ڈٹ آتابناءِ کینہ۔ ارشد پیلس مار انا پینسرہ فیصل آباد اٹی تدوک آ نن ورکرآتیان تران  کرسا اوپارے کہ نما علم اٹی ءِ کہ دا ملک اٹی 4 سال مست اسہ ہندن ءُ سازش ہراٹی بھاز انگا واکداریک اوار ئسر نا کمک اٹ اسہ نابود و نالائخ ٹولی اسے ملک آ مسلط کننگاسس ہرافتا ہچ ءُ پالیسی اس اَلوکہ و دا نابود ٹولی 4 سال اسکان داملک انا اکانومی نا بیڑا ءِ غرق کرے حالانکہ مروئی دائس کہ ہراتم حکومت اس بریک تو او اولیکو سال تینا ڈٹ آتا بنداو ءِ تخک ، ارٹ میکو و مسٹ میکو سال ڈٹ آتے پورو کرسا چارمیکو سال اوفتا بناءِ کیک و پنچ میکو سال الیکشن نا تیاری ءِ کیک ولے داحکومت ہچ ءُ بھلو ڈٹ، ہچ ءُ بھلو سڑک، موٹروے ہسپتال ، یا یونیورسٹی اس پین پین یا بجلی نا پلانٹ اس خلتنے حالانکہ داکان چپ 2013 ٹی ہراتم میاں نوازشریف نا حکومت بس تو ہمووخت آ بھلو ویل مون تروک ئسک، اسٹ لوڈشیڈنگ و ارٹ میکو ویل دہشت گردی نا ئس ولے نن لوڈشیڈنگ ءِ ہم چٹفین و ایلو کنڈآ ہرارٹ میکو دے دہشت گردی نا جاگہ نا جاگہ واقعہ اس مسکہ اونا مون ءِ تورین۔ اوپارے کہ نن دا قول اتون 2013 نا گچین کاری تیٹی بشخ ہلکن کہ اگہ نم ننے دا شرف ءِ تسرے تو نن دا ہڑتوم آ ویل آتے ایسر کینہ و مچ آ دنیا گواہ ءِ کہ 2013-18اسکان نن داہڑتوم آویل آتےا یسر کرین۔