بلوچستان نا بھلاجوتا سفائی و جوڑجاڑ نا کاریم چار آن پنچ دے اٹی پورو مننگ نا گمان، دیر انا برجاعارضی تنکی چٹک

کوئٹہ۔ 10 مئی (اے پی پی) انڈس ریور سسٹم اتھارٹی (ارسا) پارینے کہ بلوچستان نا بھلا جو تا سفائی و جوڑ جاڑ نا کاریم چار آن پنچ دے اٹی پورو مننگ نا گمان ءِ اوکان پد دریائے سندھ آن بلوچستان ءِ دیر انا فراوانی بناءِ کننگک و صوبہ نا بھلا جووالا علاقہ غاتیان دیر دوئی کروک آ ضلع شار و خلق آتیٹی دیر انا برجاعارضی تنکی چٹک۔ بلوچستان آن ’’ارسا‘‘ نا باسک عبدالمجید میڈیا ءِ پارے کہ بلوچستان نا جوتے جوڑ جاڑ و سفائی کن ہرسال 35 دے اکن بند کننگک حسب معمول اینخو نا سال ہم سفائی و جوڑجاڑ نا کاریم ءِ کننگا ہراکہ داسہ پورو مننگ والا ءِ اوکان پد دریائے سندھ آن بلوچستان نا جو والا علاقہ غاتے دیر انا فراوانی بناکننگک و بھلا جوتیان دیر دوئی کروک آ ضلع و شار و خلق آتیٹی عارضی دیر انا کاختی چٹک اوپارے کہ ارسا نا کنڈآن بلوچستان ءِ اونا کوٹہ نا پورو دیر تننگک ولے سندھ انا کنڈآن بلوچستان ءِ وخت اس ہم پورو دیر تننگتنے ہرسال مئی و جون انا تُوتیٹی بلوچستان نا کم وو د 40 آن 45 درسد دیر سندھ انا دنگ اٹ دُزی کننگک۔ عبدالحمید پارے کہ 30 سال انا ریکارڈ نا رداٹ سندھ بلوچستان نا اوسط ہرسال 32 درسد دیر کوٹہ نا رداٹ تتنے، داویل انا ایسری کن بلوچستان پدریسہ حکومت سندھ اتون رابطہ ٹی ءِ و ننے اومیت ءِ کہ دا متکن آ ویل انا آخبت ایسر اس پٹسا دانا ازالہ کن سنجیدہ گام گیج کننگک۔