بنجائی محتسب نا ریجنل آفس کوئٹہ الس نا خذمت کن ہروخت تیار ءِ، غلام سرور بروہی

کوئٹہ۔ 10 مئی (اے پی پی) بنجائی محتسب سیکرٹریٹ ریجنل آفس کوئٹہ نا سروک غلام سرور بروہی پارینے کہ تدوک آ سال مچ آ پاکستان اٹی بنجائی محتسب الس نا نود ءُ نہہ درسد ویل آتے بنسا ریلیف فراوان کرے۔ سے شنبے نادے آ ریجنل آفس کوئٹہ نا کارکڑد آن معلومدار کرسا اوپارے ک تدوک آ سال اٹی سبی ٹی ہندو محلہ نا اسہ متکن ءُ ماڑی ہراالس کن خطرہ جوڑ مسوسس بنجائی محتسب نا پرمان آ اودے دمدستی بٹسا الس نا جان ومال انا رکھ ءِ کننگا، تدوک آ سال تیرمہ ٹی الس سوئی گیس انا بل آتاخلوک ئس، الس نا بھلو کچ اس بنجائی محتسب نا ریجنل آفس کوئٹہ غا بس و عملہ دمدستی کارروائی کرسا اوفتیا خلوک ہزار آ روپئی نا جرمانہ غاتے دمدستی چٹفنگ نا پرمان جاری کرے۔ اوپارے کہ بلوچستان نا الس نا اسہ بھلو ویل اس بلاک شناختی کارڈ آتا ہم ئس ہراڑآ کارروائی کرسا بے کچ مخلوق نا بلاک شناختی کارڈ آتے جاری کرفنگا وخت اس کہ چمن اٹی زالبول آتیکن جتا ءُ بوتھ اسے نا پدتموک ویل ءِ ایسر کننگا۔ غلام سرور بروہی پارے کہ آؤٹ ڈور کمپین نا رداٹ بلوچستان نا مر مر انگا علاقہ غاتا دورہ ءِ کننگا ہرافتے ٹی حب لسبیلہ خضدار قلات مستونگ نصیر آباد جعفر آباد سوبت پور ڈیرہ اللہ یار سبی مچھ چمن وایلو علاقہ غاک اوار ئسر ہراڑے کھلی کچہری تیٹی الس تینا ویل آتا انبار اس خلک ہرافتیا دمدستی کارروائی کرسا چندی ویل آتے موقع غا ایسر کننگا ہرافتے ٹی سبی ٹی کیہی تُو آن پاسپورٹ آفس اٹی کیمرہ مفننگ نا ویل ءِ دمدستی ایسر کننگا و اوڑتون اوار اوار شار اٹی کیہی تُوآن خراب ہشت ٹاسفارم آتا دمدستی تنصیب ءِ کرفنگا ، بنجائی محتسب ریجنل آفس کوئٹہ نا کنڈآن الس نا غاو آ کوئٹہ کینٹ نا پرائیویٹ لینڈ آ ساڑی بجلی نا کھمبہ غاتے دمدستی ہرفنگا داکان بیدس بے کچ ملازم آتا پنشن کیس ہراکہ کیہی سل آن التواء نا گواچی ئسر، اوفتیا دمدستی کارروائی کرسا حقدار آتے اوفتا حق ءِ ترفنگا۔