نیب آئین و کانود ءِ مون آتخسا تینا فرض ءِ سرتننگ آ باور تخک ، جسٹس (ر) جاوید اقبال

لاہور۔ 10 مئی (اے پی پی) قومی احتساب بیورو نا چیئرمین جسٹس (ر) جاوید اقبال سے شنبے نادے آ میگا کرپشن مقدمہ غاتیٹی مروک آ پیش رفت نا جاچ ءِ ہلنگ کن نیب لاہور بیورو نا دورہ ءِ کرے۔ داوخت آ نیب لاہور نا ڈائریکٹر جنرل کمبائنڈ انویسٹی گیشن ٹیم تتون اوار چیئرمین نیب ءِ میگا کرپشن مقدمہ غاتیا جامع حوال تس۔ چیئرمین نیب زوت چندی ہاؤسنگ سوسائٹی تیان دوئی کروک آ 1 ارب آن زیات مالیت نا چیک دود اٹی زہمی تا دوٹی ایتک۔ حوال اٹی نیب آفیسر آتون مخاطب مرسا جسٹس (ر) جاوید اقبال داعزم انا درشانی ءِ کرے کہ نیب کیس آتا جاست وپاست ءِ زور یا اثرآن مبرا مرسا بیرہ میرٹ نا بنداو آ جاری تخنگے۔ اوپارے کہ نیب اسہ قومی ءُ ادارہ اسے ہرانا تعلقداری پاکستان وپاکستان نا الس و اوفتا مفاد ءِ۔ اوپارے کہ نیب انا کاریم وڈی خوری نا برخلاف ہرحالت اٹ متحرک مننگ ءِ و نیب تینا لائحہ عمل آ عملی وڑاٹ عمل کننگ ءِ۔ نیب ریفرنس آتا بابت ہیت کرسا اوپارے کہ تدوک آ 5 سال اٹی نیب 1405 دوبہ دارآتے شرفمند آ عدالت آتیان سزاترفینے ہرانیب انا آپریشنل و پراسیکیوشن ونگ انا سرسہبی نا عملی درشانی ءِ۔ نیب لاہور بیورو نا کارکڑد انا ستاءِ کرسا اوپارے کہ تدوک آ سال آتیٹی نیب لاہور ناگام گیج و ریکوریک نیب انا جم کارکڑد آ مثبت اثرمرتب کرینو۔ چیئرمین نیب پارے کہ نیب انسداد وڈی خوری نا بڑزکو آ قومی ادارہ ءِ ہرانا غٹ گام گیج آتے مدام آئین و کانود نا تابع مرسا سرتننگک۔ نیب انا کارکڑد ناچندی قومی و جہانی ادارہ غاک نئے بیرہ ستاءِ کرینو بلکن نیب ءِ اقوام متحدہ نا انسداد بدعنوانی کنونشن نا رداٹ پاکستان نا فوکل ادارہ اس ہم گوندنگانے۔