السی ویل آتا ایسر حکومت نا اولیت ءِ، نازرک حالیت آتیٹی حکومت ءِ سنبھالنگ آسان ءُ کاریم اس الوکہ ولے مسلم لیگ ن السی فائدہ غاتیکن دا چیلنج ءِ قبول کرے، وزیر مملکت داخلہ عبدالرحمان کانجو

ملتان۔ 09 مئی (اے پی پی) وزیر مملکت امور داخلہ عبدالرحمان کانجوپارینے کہ السی ویل آتا ایسر حکومت نا اولیت ءِ، داوڑنا نازرک حالیت آتیٹی حکومت ءِ سنبھالنگ آسان ءُ کاریم اس الوکہ ولے پاکستان مسلم لیگ نواز نا کماشی ٹی السی فائدہ غاتیکن دا چیلنج ءِ امنا کرے۔ داخیال آتادرشانی ءِ او تدوک آ نن تینا باوہ پیرہ ئی آ خلق کہروڑ پکاٹی السی مچی آن تران اٹی کرے۔ عبدالرحمان کانجوپارے کہ مسلم لیگ (ن) نا کماشی ملک ءِ مون تروک غٹ تنکی تا مون ءِ توننگ نا لائخی تخک و نن دا ویل آتے ہر حال اٹ ایسر کینہ۔ اوپارے کہ 2013-2018ٹی ضلع لودھراں ٹی 46 ارب روپئی نا شونداری ڈٹ پورو کرے، لودھراں خانیوال اسکان سڑک نہہ نیم تُو انا چنکو وخت اسے ٹی 24 ارب روپئی آن زیات نا خڑچ آن پورو کننگا۔ اونا پاننگ ئس کہ پی ٹی آئی حکومت تینا نابودی و بدانتظامی نا سوب آن ملک ءِ بدترین کبینی نا گواچی کرے۔ کھد، دوائی، نت وایلو گڑاتا نہاد آتے مسکوہی نابود حکومت ودفے۔وزیر مملکت پارے کہ عمران خان تینا ہیبدار کارکڑد ءِ ڈکھنگ کن ملک اٹی حکومت نا بدلی ءِ جہانی سازش اس گوندا۔ اودعویٰ کرے کہ میاں محمد نواز شریف نا برخلاف  ہمووخت آ سازش کننگا ہراتم او ایٹمی دھماکہ و چین اتون تعلقداری تا برخلاف جہانی زور ءِ مسترد کرے۔ اونا پاننگ ئس کہ پیشن نا ملک رہینگوک پاکستانی تا حق رائے دہی نا ہچ ءُ جوان ءُ وڑوڈول اس الوکہ و الیکٹرانک ووٹنگ مشین (ای وی ایم) ہم دھاندلی کن مسکوہی حکومت نااسہ ڈٹ اس ئس۔ وزیر مملکت داخلہ پارے کہ اونا وزیراعظم میاں محمد شہباز شریف و وزیراعلیٰ پنجاب حمزہ شہباز تون براہ راست رابطہ ءِ، ضلع لودھراں نا الس مدام مسلم لیگ (ن) تون تفے و سرکڑدہ اوفتے گوجالپک۔ او الس ءِ باور کرفے کہ شونداری ڈٹ آتا بناکہروڑ پکا غان کننگک۔