
نیروبی۔ 22اپریل (اے پی پی) کینیا نا فوج پارینے کہ اسہ تازہ ئُ کارروائی اسے ٹی شدت پسند رڑ الشباب نا 52 جنگوڑو ئِ تپاخت کننگانے۔ جرمن ذرائع ابلاغ نا رداٹ فوجی بیان اٹی پاننگانے کہ ہمسایہ ملک صومالیہ ٹی تعینات اونا فوج انا کنڈآن سہب انا وختی کروک آ دا عسکری کارروائی ٹی جنگوڑو آتا اسہ ٹھکانہ اسے نشانہ جوڑ کننگا۔ افریقی مشن نا رداٹ صومالیہ ٹی تعینات کینیا نا فوج بھلو توپ خانہ اسے ہم کاریم اٹ ایس۔ ہراٹی 52 جنگوڑو تپاخت کریر۔ بیان نا رداٹ آپریشن اٹی بھلو کچ اسے ٹی سلہہ و گولہ بارود ہم کوزہ ٹی ہلنگانے۔ یات سلے کہ کینیا 2011 ءٹی صومالیہ ٹی امن فوجی تعینات کریسس، ہرانا ورندی ٹی الشباب کینیا نا حکومت نا برخلاف کارروائی نا دھڑکو تسوسس۔