پیپلزپارٹی روزگار ایتک و اونا رکھ ءِ ہم کیک، سید نوید قمر

حیدر آباد۔ 06 مئی (اے پی پی) بنجائی وزیر واپار سید نوید قمر پارینے کہ پیپلزپارٹی روزگار ایتک و اونا رکھ ءِ ہم کیک دا ننا منشور نا بشخ اسے کہ روزگارآتے ملازمت تننگے و خواری کش و ملازم آتا روزگار ناکانودی رکھ ءِ ہم کننگے۔ داخیال آتا درشانی ءِ او مسکوہی باسک قومی اسمبلی نواب غنی تالپور نا فارم شیخ بھر کیوٹنڈومحمد خان اٹی تینا اعزاز اٹی عئید ملن دے انا ارغ آن تران کرسا کرے ہراڑے اوڑتون ملازم آتا اسہ ڈل اس ہم اوڑدہی کرے۔ اوپارے کہ نن روزگار تسن اوکان پد 16 ہزار ملازم آتے کشنگا ولے عدالت عظمیٰ اوفتے ولدا بحال کرینے ننا حکومت عدالت عظمیٰ نا فیصلہ غا من و عن عمل کیک۔ اوپارے کہ سپریم کورٹ ہرا ملازم آتا بحالی نا پرمان کرینے  نن بحالی نا عمل ءِ مانیٹر کننگ اُن پیپلزپارٹی نا بڑزکو سرکڑدہ ملازم آتے مون تروک مشکل آتے دمدستی مر کننگ نا ارادہ تخک۔ اوپارے کہ عمران خان نا حکومت سندھ آ ہچ ءُ چکار اس کتو ہراڑآن داجاگہ نا الس نا مشکل آتیٹی ودکی مسنے کبینی ولوڈشیڈنگ سندھ انا الس نا معاش ءِ بھس و زند ءِ ژند کریسس، ولے داسہ ننا مخلوط حکومت خواہش تخک کہ الس ءِ زوت آن زوت ریلیف تننگے۔ اوفتا مشکل آتے مر کننگے بجلی نا تنکی و کبینی چٹے نن داڑآ چکار تخانن۔ داوخت آ مسکوہی قومی اسمبلی نا باسک نواب عبدالغنی تالپور تران کرسا پارے کہ جمہوریت نا بحالی زیان مفک، الس نا ویل آک ایسر مریرہ، و عدالت عظمیٰ نا تاریخ ساز فیصلہ نا بھرم زوت بحال مروک آ ملازم آتسکان سرمریک۔ داکان مست اولیکو وار نواب غنی تالپور زرعی فارم آ بنجائی وزیر سید نوید قمر نا بننگ آ اودے جم وجوش اٹ بخیر کننگا سندھ اناروایتی اجرک و ٹوپی و گلدستہ اس پیش کننگا۔ داوخت آ نواب زبیر تالپور ، نواب شہریار تالپور ، نواب عظیم تالپور، میر نواز علی تالپور، ڈپٹی کمشنر ٹنڈو محمد خان و ایکوشرفمند و سرکڑدہ غاک ساڑی ئسر۔