عمران خان عئید آ تینا بے سہبی، وعدہ خلافی، کرپشن و دُزی تا ماتن ءِ بند کے، بنجائی وزیر حوالکاری و شینکاری مریم اورنگزیب

اسلام آباد۔ 03 مئی (اے پی پی) بنجائی وزیر حوالکاری و شینکاری مریم اورنگزیب پارینے کہ عمران خان عئید آ تینا بے سہبی، وعدہ خلافی، کرپشن و دُزی تا ماتن ءِ بند کے۔ تینا ٹویٹ اٹی اوپارے کہ عمران صاحب اللہ نا واسطہ ءِ ، عئید انا مبارک و خوشی تا دے ءِ الس ءِ اڈتننگ کن ہلے، چارسال آن پد اوفتے کبینی آن زرس ریلیف و خوشی آن پُر عئید اس نصیب مسنے۔ اینو نادے تینا دروغ و زبان ءِ آرام ایت۔ بنجائی وزیر حوالکاری پارے کہ عمران خان عئید آ تینا بے سہبی، وعدہ خلافی، کرپشن و دُزی تا ماتن ءِ بند کے۔ بیست ءُ دو کروڑ الس نا خوشی تے خراب کپ۔ مریم اورنگزیب پارے کہ مننگ کے تو اینو نا دعاتا قبولیت نا دے تینا دروغ و کرپشن آ اللہ تعالیٰ نا حضور شکی گری نا منہ لوز پاہ، الس آن معافی خواہ۔ عئید انا دے ءِ تو معاف کہ۔