پی ٹی آئی نا دور حکومت اٹ زرگزران نا حالیت بھاز خراب ئس، لکھ آ مخلوق بے روزگار مس، بنجائی وزیر خزانہ مفتاح اسماعیل

کراچی۔ 05 مئی (اے پی پی) بنجائی وزیر خزانہ مفتاح اسماعیل پارینے کہ تحریک انصاف نا دور حکومت اٹ زرگزران نا حالیت بھاز خراب ئس، لکھ آ مخلوق بے روزگار مس و کبینی تاریخ نا بڑزانگا کچ آ سرمس۔ داخیال آتا درشانی ءِ او پنچ شنبے نادے آ پریس کانفرنس آن تران کرسا کرے۔ مفتاح اسماعیل پارے کہ عمران خان آئی ایم ایف تون معاہدہ ٹی پیٹرول نا نہاد ءِ 245 وخت اس کہ ڈیزل نا نہاد ءِ 290 اسکان ودفنگ آ امنا کریسس۔ اوپارے کہ وزیراعظم شہباز شریف نا پارت آ ہندا تُو حکومت پیٹرولیم مصنوعات آ اسہ سد ءُ دو ارب روپئی نا سبسڈی تننگ ءِ۔ بنجائی وزیر پارے کہ عمران خان نا حکومت ملک انا غٹ آن زیات وام ہلک اوکان پد ہم گردشی وام تیٹی ودکی تون اوار ایلو ویل مون تروک ءِ۔ اوپارے کہ عمران خان نا دور ہفت ءُ نیم ہزار میگاواٹ نا ڈٹ بند کننگا ہرانا سوب آن لوڈشیڈنگ اٹی ودکی مس۔ وزیرخزانہ مفتاح اسماعیل پارے کہ عمران خان تینا سنگت آتے خوش کننگ کن رئیل اسٹیٹ و انڈسٹری ٹی ایمنسٹی تس۔ اوپارے کہ مسکوہی حکومت نا نابودی نا سوب آن ملکی زرگزران ءِ ناقابل تلافی نسخان رسینگانے ہرانا بھاریم ءِ لس الس ءِ ہرفوئی تمنگ ءِ۔ اوپارے کہ ن لیگ نا دور حکومت اٹ زرگزران شون ہلککہ ولے عمران خان زرگزران اٹ بارودی سرنگ تالان کرسا ہنانے۔ اوپارے کہ یوٹیلیٹی اسٹور آتیٹی المی آ گڑاتے نن نیزگار الس کن اڑزآن کرینن۔