وزیراعظم محمد شہباز شریف نا 10 اوغان صوبہ غاتیٹی نوکاپ، نہادی جان و مالی نسخان تیا است ہسونی نا درشان

اسلام آباد۔ 05 مئی (اے پی پی) وزیراعظم محمد شہباز شریف اوغانستان نا 10 صوبہ غاتیٹی نوکاپ ، نہادی جان و مالی نسخان تیا است ہسونی نا درشانی ءِ کرینے و اوغان عبوری حکومت و الس تون یکجہتی نا درشانی ءِ کرسا زوال کروک آخاہوت و ایلو زہمی تتون ہمدردی نا درشانی ءِ کرینے، جہانی برادری اوغانستان اٹی نوکاپ نا بھسکاری تتون مون تننگ کن اوغان الس ءِ ہلہلہ ئی امداد کن مون آ برے، پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم اوغانستان نا نوکاپ زدگان آتون ہمدردی نا درشانی ءِ کرسا جہانی برادری و او آئی سی اوغان ہیومینٹیرین ٹرسٹ انا فورم آن زہمی اوغان الس نا کمک کننگ نا کوشست آتے ترند کننگ نا ہم خاست کرے وپارے کہ نوکاپ اٹی اوغانستان اٹی مست آن برجا انسانی تنکی ٹی پین شدت ودی مننگ نا گڑتی ءِ۔ اوپارے کہ وخت آ گام گیج کننگتو تو جانی نسخان تا ودنگ نا خطرہ ءِ ہراڑکن دمدستی ہلہلہ ئی گام گیج درکار ءِ۔ وزیراعظم شہباز شریف پارے کہ خور، طبی امداد، بے اُرا بندغ آتے پناہ گاہ تا فراوانی کن جہانی برادری خاص وڑاٹ اقوام متحدہ اوغانستان نا کمک ان پروگرام نا بناءِ کے۔ اوپارے کہ اوغانستان نا مشکل نا داساہت اٹی اوغان الس تون تفوک ءِ ، ہرممکن امداد کینہ۔ وزیراعظم تعلقدار کمامدارآتے اوغانستان نا نوکاپ آن زہمی الس ءِ امداد نا فراوانی نا ہم پرمان کرے و پارے کہ پاکستان زہمی تیکن ہلہلہ ئی امداد گدریفنگ ءِ۔ وزیراعظم زوال کروک آتا بخشش و خاہوت کن صبر و جمیل نا دعاہم کرے۔