وزیراعظم محمد شہباز شریف نا صدر، وزیراعظم آزاد کشمیر ، آصف علی زرداری تون اوار غٹ سیوتی جماعت آتا سرکڑدہ و وزیراعلیٰ تے ٹیل فون ، چنکا عئید انا مبارکبادی تس

اسلام آباد۔ 04 مئی (اے پی پی) وزیراعظم محمد شہباز شریف صدر ڈاکٹر عارف علوی، وزیراعظم آزاد کشمیر  سردار تنویر الیاس، مسکوہی صدر آصف علی زرداری تون اوار غٹ سیوتی جماعت آتا سرکڑدہ و وزیراعلیٰ تے ٹیل فون آ چنکا عئید انا مبارکبادی تسنے۔ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف صدر ڈاکٹر عارف علوی ءِ ٹیل فون کرے اودے چنکا عئید انا مبارکبادی تس و نیک است خواہی نا درشانی ءِ کرے۔ وزیراعظم شہباز شریف آزاد جموں و کشمیر نا وزیراعظم سردار تنویر الیاس ءِ ٹیل فون کرے و اہل جموں و کشمیر ءِ عئید انا مبارکبادی تس۔ وزیراعظم مقبوضہ جموں و کشمیر نا الس آ عئید انا نماز نا اجتماع تیا پابندی تا مذمت ءِ کرے۔ اوکشمیری تے حق استصواب رائے ملنگ اسکان پبی سیاسی، اخلاقی و سفارتی مخ تفی ءِ برجا تخنگ نا عزم انا درشانی ءِ کرے۔ وزیراعظم شہباز شریف ٹیل فون آ سندھ، خیبرپختونخوا، گلگت بلتستان نا وزیراعلیٰ و قائم مقام گورنر بلوچستان ءِ ہم عئید انا مبارکبادی تس۔ اووزیراعلیٰ سندھ سید مراد علی شاہ و وزیراعلیٰ بلوچستان ءِ ٹیل فون کرے۔ وزیراعلیٰ بلوچستان نا پیشن نا ملک دورہ غا مننگ نا سوب آن وزیراعظم نا اوڑتون ہیت مننگ کتو۔ وزیراعظم شہبازشریف غٹ سیوتی جماعت آتا سرکڑدہ، وزیراعلیٰ تے ٹیل فون آ عئید انا مبارکبادی تس و نیک است خواہی نا درشانی  ءِ کرے۔ وزیراعظم مسکوہی صدر آصف علی زرداری و پاکستان پیپلزپارٹی نا چیئرمین و وزیر خارجہ بلاول بھٹو زرداری ءِ فون کرے و عئید انا مبارکبادی تس۔ مسکوہی صدر آصف زرداری و بلاول بھٹو وزیراعظم ءِ مبارکبادی تسر و ٹیل فون کننگ آ منت واری ءِہرفیر۔ وزیراعظم شہباز شریف پی ڈی ایم نا سروک مولانا فضل الرحمان تون ہم فون آ گپ وتران کرے، عئید انا مبارکبادی تس و ملکی حالیت آتیا گپ وتران کرے۔ مولانا فضل الرحمان سعودی عرب و متحدہ عرب امارات نا سرسہب دورہ غاتیا وزیراعظم ءِ مبارکبادی تس۔ وزیراعظم امیر جماعت اسلامی سراج الحق ءِ ٹیل فون کرے و اودے چنکا عئید انا مبارکبادی تس ، ہڑتوم آ راہشونک ملکی سدیاسی حالیت آتیا ہم گپ وتران کریر۔ وزیراعظم بنجائی وزیر مواصلات مولانا اسعد محمود، محسن داوڑ، خالد مقبول صدیقی، سردار اخترمینگل ، علامہ ساجد میر و خالد مگسی تون ہم ٹیل فون آ گپ وتران کرے، عئید انا مبارکبادی تس۔ وزیراعظم شہباز شریف محمود خان اچکزئی ، علی نواز شاہ، شاہ زین بگٹی، اسلم بھوتانی، چوہدری سالک حسین تون ہم ٹیل فون آ ہیت کرے و عئید انا مبارکبادی تس۔ وزیراعظم چوہدری سالک  حسین آن چوہدری شجاعت حسین نا مزاج پرسی  ءِ کرے و نیک است خواہی نا درشانی ءِ کرے۔