نابود و نالائخ ٹولی پاکستانی قوم انا چارسال ءِ زیان کرے، وزیرداخلہ رانا ثناء اللہ نا عئید ملن پارٹی آن تران

فیصل آباد۔ 04 مئی (اے پی پی) بنجائی وزیر داخلہ رانا ثناء اللہ خان پارینے کہ نابود و نالائخ ٹولی پاکستانی قوم انا چارسال ءِ زیان کرے وخت اس کہ اوفتا الس تون کروک آ قول ریک انا دوال اس جوڑ مس ولے داسہ ہراتم جمہوری، آئینی ، کانودی و پارلیمانی وڑاٹ مسکوہی حکمران تیان الس نا جان ءِ خلاص کننگانے تو اوفتے الیکشن نا دورہ تمنگ ءِ ، ولے اوفک پہہ مریر کہ قومی خزانہ ءِ پُلنگ و ملکی زرگزران نا نسخان نا حساب ءِ ہلنگ آن بیدس گچین کاری مفک، الیکشن نا جوان انگا وخت ہراسٹ ءِ دا فیصلہ ءِ داسہ ننے کروئی ءِ۔ او دھاندرہ ٹی تروک آ عئید ملن پارٹی آن تران کریکہ۔ اوپارے کہ اپوزیشن جماعت آک آئینی و کانودی وڑاٹ عمران نیازی ءِ اقتدار آن رخصت کرسا ملک آ چارسال آن تالان بے برکتی و نحوست ءِ چٹفنگانے۔ ہالانکہ نیازی تون اختیار ئسک کہ او وخت آفیصلہ کرسا اسمبلی تے پرغوسس و پوسکن گچین کاری کرفوسس ولے اووخت ءِ زیان کرے و اینو حکومت آن گچین کاری نا خیرات ءِ خواہنگ ءِ۔ اوپارے کہ عمرانی حکومت نیزگار الس کن ہچ ءُ آسودہی ڈٹ اس جوڑ کتو بلکن سی پیک آ ہم کاریم بند ئس ہنداخاطرآن داکان بھلا اونا نابودی پین انت اس مننگ کیک۔ رانا ثناء اللہ خان پارے کہ عمران خان اسہ وار ولدا قوم ءِ ریفنگ نا کوشست کننگ ءِ ولے اودے داسہ تینا عزم اٹی سرسہبی ملنگ کپک۔ اوپارے کہ داداسہ تینا دور حکومت اٹ کبینی ، بے روزگاری، لاکانودیت و رشوت ستانی و لٹ وپل آ پڑدہ شاغنگ نا کوشست کننگ ءِ، اوپارے کہ عمران حکومت ملکی زرگزران نا بیڑہ ءِ غرق کرے و غلط پالیسی تیان پاکستان ءِ کبینی نا مین اٹ اختہ کرے ہرانا اودے حساب  تروئی مریک، داوخت آ کارندہ غاتا بھلو کچ اس ہم ساڑی ئسر۔