مظفرآباد۔ 04 مئی (اے پی پی) وزیراعظم آزاد کشمیر سردار تنویر الیاس خان چنکا عئید ءِ چکو ٹھی سیکٹر اٹی کنٹرول لائن آ ورنا و باہوٹ آتون گدریفے۔ کشمیر میڈیا سروس نا رداٹ وزیراعظم آزاد کشمیر داوخت آ ساڑی مخلوق آن تران کرسا پاکستان نا فوج انا جری آفیسر و ورناتے خراج تحسین پیش کرے۔ اوپارے کہ ننے تینا نرزور سلہہ بند فوج آ گمر ءِ ہرا وطن عزیز نا سالمیت ءِ پک کننگ کن ہروخت تیار ءِ۔ تینا کلہو اٹی اوبھارت ءِ پارے کہ مچ آ قوم سلہہ بند فوج اتون ہم کوپہ سلوک ءِ و ہروڑنا اشتعال انگیزی نا پبی ورندی ءِ تننگک۔ اوپارے کہ پاک فوج انا شہید آک ننا پیشانی نا جھومر ءُ و قربانی تا داسفر بھارتی کوزہ ٹی کشمیر نا آجوئی اسکان برجاسلک۔ اوبھارت آ زور شاغا کہ او مقبوضہ جموں و کشمیر اٹی برجاظلم و بربریت ءِ بند کے۔ وزیراعظم اقوام متحدہ آن خواست کرے کہ او مقبوضہ جموں و کشمیر نا ڈغاری راستکی تے ہُننگ کن ہموڑے اسہ ‘‘فیکٹ فائنڈنگ’’ مشن اس گدریفے۔ اومقبوضہ جموں وکشمیر نا الس ءِ کلہو تس کہ بیس کیمپ انا حکومت ، پاکستان نا فوج و حکومت پاکستان نا است نم تون اوار سُرک۔ وزیراعظم آزاد کشمیر خواست کرے کہ جہانی برادری و انسانی حق انا علمبردار مقبوضہ ڈیہہ ٹی بھارتی جنگی ڈوہ و انسانی حق انا خلاف ورزی تے توننگ کن تینا کڑد ءِ ادا کے۔
