اسلام آباد۔ 06 اپریل (اے پی پی) پاکستان تحریک انصاف نا راہشون چوہدری فواد حسین پارینے کہ سیاسی سوگوی نا گچین کسر گچین کاری ءِ، ملک ءِ سوگوی نا کنڈآ اتنگتو تو ملکی زرگزران ءِ بھاز نسخان مریک، آرٹیکل 63 اے آئین نا بشخ ءِ۔ داہیت ءِ او چارشنبے نادے آ پارلیمنٹ ہاؤس نا پیشن ڈی چوک اٹی میڈیا تون گپ وتران کرسا پارے۔ چوہدری فواد حسین پارے کہ تحریک بے پتی نا باندات اتون ننے ہروئی مریک کہ آرٹیککل 63 اے نا خلاف ورزی مس یا آخا، مخلوق ءِ ایٹ و میڷ آتیانبار ہلنگا و سندھ ہاؤس اٹ تخنگا۔اوپارے کہ او ہرا مٹیریل ئس ہراڑآ ڈپٹی اسپیکر دا نتیجہ غا سرمس کہ تحریک بے پتی جوڑ مفک، دا مٹیریل ءِ ڈاکٹر بابر اعوان ءِ پیش کروئی اف ، داڑآ ان کیمرہ ہیت کننگ مریک، دا مٹیریل اٹارنی جنرل یا وزیراعظم نا وکیل ہمووخت آ پیش کننگ کیرہ ہراتم عدلیہ اوفتے پیش کننگ نا موکل ایتک۔ اوپارے کہ پاکستان نا تہہ ٹی زوت آن زوت سیاسی سوگوی نا گرج ءِ، سیاسی سوگوی کن الیکشن نا کنڈآ بایدے ہِننگے، سیاسی نزوری نا سوب آن ڈالر نا ریٹ 186 روپئی آ سرمسنے، اگہ دا نزوری برجاسلیس تو نن زرگزرانی گچینی کن ہراگام گیج آتے کریسن ، اوفک ہم زیان مریرہ۔ چوہدری فواد حسین پارے کہ سیاسی سوگوی کن گچین آ کسر گچین کاری ءِ، ن لیگ و اپوزیشن نا ہم خواست ئسک کہ ملک اٹی گچین کاری مرے۔ اوپارے کہ اسمبلی پنانے، داسہ پٹیشن دادے کہ اسمبلی سہی وڑاٹ تحلیل متنے ، اودے بحال کننگے، نن تحریک بے پتی اس اتین و ولدا حکومت ءِ گدریفن۔ اوپارے کہ اپوزیشن نا سوچ اوفتا نت تسکان ءِ ، ملک ءِ سوگوی نا کنڈآ اتنگتو تو ملکی زرگزران ءِ بھاز نسخان مریک۔
