اسلام آباد۔ 10 مارچ (اے پی پی) وزیرخارجہ مخدوم شاہ محمود قریشی پارینے کہ انسانی شرف ءِ پک ، زالبول آتے واکدار کننگ، اقلیت آتا حق انا رکھ ءِ کننگ و بین المذاہب ہم آہنگی ءِ مون آ دننگ ننا حکومتی نا پالیسی نا اہم ءُ بشخ اسے۔ اوداہیت ءِ اقوام متحدہ نا ہائی کمشنر انسانی حق مشیل بیچلیٹ تون گپ وتران کرسا پارے ہرا پنچ شنبے نادے آ وزارت خارجہ ٹی اوڑتون اوڑدہی کرے۔ دفترخارجہ نا رداٹ وزیر خارجہ انسانی حق، بنداوی آجوئی تا مون آ دننگ و رکھ اکن پاکستان نا عزم انا درشانی ءِ کرے و مذہب یا عقیدہ نا آجوئی نا مون آ دننگ، حق خودارادیت، غلط معلومداری تا مقابلہ ءِ کننگ و اسلاموفوبیا نا بارواٹ شعور تالان کننگ نا بابت پاکستان نا کڑد ءِ مون آتخا۔ وزیرخارجہ پیدوار کرے کہ انسانی شرف ءِ پک کننگ، زالبول آتے واکدار کننگ و رکھ فراوان کننگ، چناتا حق ءِ مون آ دننگ، اقلیت آتا حق انا رکھ ءِ کننگ و بین المذاہب ہم آہنگی ءِ مون آ دننگ ننا حکومتی پالیسی نا اہم ءُ بشخ اسے۔ وزیرخارجہ و ہائی کمشنر بیچلیٹ اوغانستان اٹی انسانی حالیت آتیا ہم گپ وتران کریر۔ شاہ محمود قریشی پارے کہ اوغانستان نا الس ءِ انسانی امداد نا فراوانی غیر مشروط بایدے مرے و اوغانستان نا غٹ منجمد میرات آتے اوغان الس ءِ بایدے پدی تننگے۔ وزیرخارجہ ہائی کمشنر ءِ بھارت نا غیرکانودی کوزہ گیری ٹی جموں و کشمیر اٹی انسانی حق انا بھلا، منظم و بھلو کچ اسے آ خلاف ورزی تا سرجم آتیان معلومدار کرے و ہموڑے انسانی حق انا بھلا حالیت آتا پدریسہ چاروکی و رپورٹنگ آ انسانی حق انا ہائی کمشنر نا دفتر و اقوام متحدہ نا خصوصی مینڈیٹ ہولڈرآتا منت واری ءِ ہرفے۔ اوپارے کہ ننے، بھارت سرکاری نا کنڈآن بھارت نا غیرکانودی کوزہ گیری ٹی جموں وکشمیر اٹی غیر کانودی آبادیاتی بدلی تیا بھاز گڑتی ءِ۔ بھارت نا غیر کانودی کوزہ گیری ٹی جموں و کشمیر اٹی ، سفاکانہ کانود آتا اطلاق آن انسانی حق انا محافظ آتا برخلاف انتقامی جلہو، عدالت آن ایڑتر خون، جعلی مقابلہ و ماڑی تا بھسکاری، معمول اس جوڑ مسنے۔ وزیرخارجہ انسانی حق انا مون آ دننگ و رکھ و پائیدار شونداری نا ایجنڈا نا پوروی کن ، اقوام متحدہ نا انسانی حق مشینری تون، پاکستان نا پدریسہ کمکاری نا درشانی ءِ کرے۔
