اسلام آباد۔ 15 مئی (اے پی پی) وزیراعظم محمد شہباز شریف آذربائیجان نا کنڈآن پاکستان تون پبی یکجہتی و مخ تفی نا درشانی آ صدر الہام علیوف نا منت واری ءِ ہرفسا پارینے کہ پاکستان و آذربائیجان مدام سُچا ایلم تیانبار اسہ ایلوتون تفینو۔ پنچ شنبے نادے آ وزیراعظم آفس نا میڈیا ونگ انا کنڈآن جاری بیان نارداٹ وزیراعظم محمد شہباز شریف جمہوریہ آذربائیجان نا صدر الہام علیوف ءِ ٹیل فون کرے و سویلی ایشیانا ساڑی آ تنکی ٹی آذربائیجان نا کنڈآن پبی یکجہتی و مخ تفی آ صدر الہام علیوف نا منت واری ءِ ہرفے۔ اوپارے کہ صدر الہام علیوف نا آخبتی مخ تفی پاکستانی الس تون اونا بے پناہ مہرومریبت و پیار انا اسہ پین درشانی اسے۔ وزیراعظم پاکستان تون یکجہتی نا درشانی آ آذربائیجان نا ایلم الس نا ہم منت واری ءِ ہرفے۔ اوپارے کہ اسہ وار ولدا ہڑتوم آملک آتا نیام اٹ پائیدار و متکن آ سنگتی نا درشانی مسنے، پاکستان و آذربائیجان نا الس سُچا ایلم تیانبار اسہ ایلو تون تفینو۔ وزیراعظم داہیت آ زور شاغا کہ پاکستان علاقائی امن کن بھارت تون جنگ بندی مفاہمت آ امنا کرینے و اودے برقرارتخنگ کن سنبرینگوک ءِ۔ وزیراعظم محمد شہباز شریف بھارتی سرکڑدہ نا ساڑی آ اشتعال انگیز بیان تیا تینا گڑتی نا درشانی ءِ کرسا داہیت انا درشانی ءِ کرے کہ آخبت اٹی ہرجارحیت تون مون تننگ کن پاکستان تینا وتواجہی و علاقائی سالمیت نا پبی دفاع ءِ کیک۔ وزیراعظم زور شاغسا پارے کہ جموں وکشمیر نا جھیڑہ سویلی ایشیاٹی نزوری نا بنداو ءِ ہرادے اقوام متحدہ نا سلامتی کونسل نا قرارداد آتا رداٹ ایسر کننگے۔ وزیراعظم محمد شہباز شریف کشمیر کاز اکن پاکستان نا اصولی مخ تفی آ صدر علیوف نا منت واری ءِ ہرفے۔ وزیراعظم پاکستان آذربائیجان نا نیام اٹ خصوصی و وخت انا آزمائشت آ پورو سلوک آ برادرانہ تعلقداری تے مون آ تخسا پارے کہ پاکستان دا سنگتی ءِ تین پہ تینی وڑاٹ فائدہ مند اقتصادی شریداری ٹی بدل کننگ کن پورووڑاٹ سنبرینگوک ءِ۔ اوپاکستان نا چندی بشخ آتیٹی آذربائیجان نا کنڈآن 2 ارب ڈالر نا زرکاری نا بابت سلاہ تے گڈیکو دروشم اس تننگ کن مروک آ پیش رفت آ است جمی نا درشانی ءِ کرے۔ اوصدر الہام علیوف ءِ زوت پاکستان نا سرکاری دورہ ءِ کننگ نا سلہ نا تجدید ہم کرے ہرا صدر الہام علیوف امنا کرے۔ صدر علیوف پاکستان نا شاندار سرسہبی آ وزیراعظم ءِ مبارکبادی تس۔ اوامن کن پاکستان نا کوشست آتا ستاءِ کرسا جنگ بندی مفاہمت نا ستاءِ کرے۔ اوداہیت انا درشانی ءِ کرے کہ آذربائیجان پاکستان تون غٹ بشخ آتیٹی تینا برادرانہ تعلقداری تے سوگو کننگ کن سنبرینگوک ءِ۔
