وزیراعظم نا بزغرآتے آسان شڑت آتیا کشاری وام تا فراوانی ءِ پک کننگ، کشاری پٹ وپول آ چکار کننگ، کشاری بشخ انا شونداری کن مربوط حکمت عملی اس جوڑ کننگ ناپارت

اسلام آباد۔ 15مئی (اے پی پی) وزیراعظم محمد شہباز شریف بزغرآتے آسان شڑت آتیا کشاری وام تا فراوانی ءِ پک کننگ، ملکی پیدوار ءِ ودفنگ کن کشاری پٹ وپول آ چکار کننگ و کشاری بشخ انا شونداری کن تعلقدار فریق آتا سلابت اٹ مربوط حکمت عملی اس جوڑ کننگ نا پارت کرساپارینے کہ کشاری خودکفالت نا دوئی کننگ کن کشت وکشار نا بشخ ءِ پوسکن آوڑتتون ہم گرنچ کننگ انگ ءِ، زرگزران نا دمدستی شونداری کن کشاری بشخ انا گیشتر کچ ءِ کاریم اٹ اتینہ۔ چارشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی کشاری بشخ اٹی اصلاحات نا بابت دیوان اس اڈہلک۔ وزیراعظم دیوان آن تران کرساپارے کہ اللہ تعالیٰ پاکستان ءِ زرخیز ڈغار، قابل کشاری چاہندار تسنے، ننا بزغر جفاکش و خواری کش ءُ۔ وزیراعظم پارت کرے کہ بزغرآتے آسان شڑت آتیا کشاری وام تا فراوانی ءِ پک کننگے، ملکی پیدوار ءِ ودفنگ کن کشاری پٹ وپول آ چکار کننگے، اوپائیدار و مریس مدی کشاری صنعتی شونداری نا پالیسی جوڑ کننگ نا گرج آ زور شاغا تانکہ ملک اٹی کشت وکشار تون اوار اوار جنگل آتے ہم مون آدننگک ہراکہ چاگڑدی بدلی تا مقابلہ ءِ کننگ کن بھاز اہم ءِ۔ وزیراعظم پارت کرے کہ کشاری بشخ انا شونداری کن تعلقدار فریق آتا سلابت اٹ مربوط حکمت عملی اس جوڑ کننگے، دا چرجوئی ٹی صوبہ غاتون سلابت ہم  پک کننگے، وزیراعظم کشاری بشخ انا بابت نیشنل ایگری انوویشن پلان اس پیش کننگ، کشاری بج آتا سرٹیفکیشن نا نظام اٹی برجااصلاحات اٹی ترندی اتنگ و بڑزکو آب انا بج آتا مون آدننگ نا بابت گچین لائحہ عمل اس تیار کننگ نا ہم پارت کرے، وزیراعظم پارے کہ کشاری بشخ اٹی پوسکن آٹیکنالوجی ءِ مون آدننگ ننا اولیت ءِ، اوکشاری بشخ انا بابت جوان ریگولیٹری فریم ورک اس ترتیب تننگ نا پارت کرے، دیوان اٹی کشاری بشخ اٹی اصلاحات نا بابت جوڑ کروک ورکنگ گروپ نا کنڈآن سلاہ پیش کننگا، دیوان اٹی بنجائی وزیر قومی غذائی رکھ وپٹ وپول رانا تنویر حسین ، بنجائی وزیر اقتصادی امور احدخان چیمہ، بنجائی وزیر خزانہ ومحصولات محمد اورنگزیب، بنجائی وزیر موسمیاتی بدلی مصدق ملک و تعلقدار بڑزکو سرکاری آفیسر آک بشخ ہلکر۔