اسلام آباد۔ 10 مارچ (اے پی پی) وزیر داخلہ شیخ رشید احمد پارینے کہ ہرمسٹ آ مخالف سیاسی پارٹی تے وزیراعظم و احتساب نا خلیس یکجا کرینے، تحریک بے پتی آ اپوزیشن ءِ شکست ایتنہ، تحریک بے پتی عمران خان کن تحریک است جمی اس جوڑ مریک، اسپیکر نا واکداری تے کس اس چیلنج کننگ کپک، وزیراعظم عمران خان ہندا تُو ای پاسپورٹ نا بناءِ کیک، نن سپرپاور اتون گچین تعلقداری خوانہ، وزیراعظم خارجہ پالیسی نا بابت قوم ءِ پت اٹ ہلکونے، بے پتی والا دے پی ٹی آئی نا غٹ باسک آک اسمبلی آ بفسہ۔ داخیال آتا درشانی ءِ او پنچ شنبے نادے آ داڑے پولیس سہولت سینٹر نا دورہ ءِ کننگ آن پد میڈیا تون گپ وتران کرسا کرے۔ وزیر داخلہ شیخ رشید احمد پارے کہ آئی جیز و پولیس ءِ دہشت گردی نا چٹفنگ نا پارت کرینے، نن غٹ پولیس اسٹیشن تیٹی ویڈیو و آڈیو کیمرہ خلکن، پاکستان نا برخلاف جہانی سازش مننگ ءِ۔ اوپارے کہ 23 آن 30 مارچ اہم ہفتہ ءِ، اپوزیشن تینا شوق ءِ پورو کے، ہرادے تحریک بے پتی آ ووٹنگ مریک تحریک انصاف نا غٹ اسمبلی نا باسک آک پیشن ڈی چوک آ مریرہ، اسپیکر قاعدہ و ضابطہ نا رداٹ اسمبلی دیوان ءِ بٹنگ کیک، اسپیکر تون فلور کراسنگ ءِ توننگ نا واکداری ہم ساڑی ءِ و اونا واکداری تے کس اس چیلنج کننگ کپک، اپوزیشن ءِ بے پتی کن 172 قومی اسمبلی نا باسک اتوئی بروئی مریک، اگہ پی ٹی آئی نا باسک اس داوونٹ انا توہین ءِ کیک ہرا اودے عمران خان نا سوب آن ملا تو اسپیکر اونا برخلاف ایکشن ہلیک و اودے نابود کننگ کیک۔ وزیر داخلہ پارے کہ اپوزیشن تون اپریل فول اس کینہ، ہرابولیک لگنگ ءُ مخلوق اوفتا بولی تے منپسہ، تحریک بے پتی آ اپوزیشن ءِ شکست ایتنہ، ہندادے سرسہبی آ شکرانہ نا نفل اس خواننہ، چھانگا مانگا نا سیاست چٹک، مستین اٹ سیاسی جماعت آک باسک آتے چھانگا مانگا و مری ٹی بند کریرہ، تحریک بے پتی عمران خان کن تحریک است جمی اس جوڑ مریک۔ ہرمسٹ آ جماعت آتا انجمن مفاد باہمی ءِ احتساب نا خلیس ءِ، بنجائی وزیر پارے کہ بلاول سندھ آن ہرامخلوق ءِ ایسوسس اوفتیان ننا پولیس زیات ئسر، بلاول نا مارچ مایوسی نا سوب ئسک۔ اسہ سوج اسے نا ورندی ٹی او پارے کہ مسکوہی صدر نا قبر آ نعرہ بازی کروک آتا برخلاف کانود نا رداٹ مقدمہ درج کینہ، بلاول ءِ اونا حال ءِ ہلیبو، اونا برخلاف ہچ ءُ ہیت اس مفک۔ وزیرداخلہ شیخ رشید احمد پارے کہ اسلام آباد اٹی ایپ اس جوڑ کرینن ہرانا کمک اٹ براہ راست پولیس آفیسر و ایس ایچ او تتون رابطہ کننگ کیرہ۔
