اسلام آباد۔15مئی (اے پی پی): مزن وزیر محمد شہباز شریف ءَ آذربائیجان ءِ پاکستان ءِ واستہ مھکمیں یکوئی ءُ کمک ءِ سر ءَ صدر الہام علیف ءِ منت گپت ءُ گوشت کہ پاکستان ءُ آذربائیجان مدام یک راستیں برات ءِ رنگ ءَ یکے دومی ءِ کش ءَ اوشتاتگ اَنت۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ جمہوریہ آذربائیجان ءِ صدر الہام علیف ءَ را ٹیلی فون کتگ ءُ جنوبی ایشیا ءِ گوستگیں بحران ءِ تہ ءَ آذربائیجان ءِ مھکمیں یکوئی ءُ کمک ءِ سر ءَ صدر الہام علیف ءِ منت گپتگ۔ آئی ءَ گوشت کہ صدر الہام علیف ءِ برجاھیں کمک پاکستان ءِ اُلس ءَ گوں آئی ءِ بے دروریں مہر ءُ دوستی ءِ یک دگہ درشان اِنت۔ مزن وزیر ءَ پاکستان ءِ گوما یکوئی کنگ ءِ پد ءَ آذربائیجان ءِ براتیں الس ءِ ھم شگر ءُ منت گپت۔ آئی ءَ گوشت کہ یک رند ءِ پد ءَ دوئیں ملک آنی نیام ءَ برجم ءُ دیریں دوستی ءِ درشان کنگ بوتگ، پاکستان ءُ آذربائیجان ءِ اُلس ھمک وھد ءَ راستیں برات ءِ رنگ ءَ یک ءِ دومی ءِ گوما اوشتاتگ اَنت۔ مزن وزیر ءَ اے گپ ءِ سر ءَ زور پر دات کہ پاکستان ءَ دمگی امن ءِ واستہ بھارت ءِ گوما جنگ بندی ءِ معاہدے ءِ سرا تپاک کتگ ءُ ایشی ءِ برجائی ءِ واستہ جزمیگ اِنت۔ مزن وزیر محمد شہباز شریف ءَ بھارتی سروکی ءِ نیمگ ءَ چہ گوستگیں اشتعال انگیز بیانانی سر ءَ وتی جیڈھ ءِ درشان کنان ءَ اے گپ ءِ یک رندے پدا گوشت کہ پاکستان آیوکیں وھد ءَ ھرچ وڑیں زوراکی ءِ دیم ءَ دارگ ءِ واستہ وتی حاکمیت ءُ سرزمین ءِ یکوئی ءِ سر ءَ زبردستی ءَ گوں دیمپانی کنت۔ مزن وزیر ءَ اے گپ ءِ سر ءَ زور پر دات کہ جموں کشمیر ءِ جیڈھ جنوبی ایشیا ءَ بے رھبندی ءِ بنیات اِنت ایشی ءَ را اقوام متحدہ ءِ سلامتی کونسل ءِ قرارداد آنی رد ءَ گیش ءُ گیوار کنگ لوٹ ایت۔ مزن وزیر محمد شہباز شریف ءَ کشمیر ءِ معاملہ ءِ واستہ پاکستان ءِ اصولی کمک ءِ سر ءَ صدر علیف ءِ منت گپت۔ مزن وزیر ءَ پاکستان ءُ آذربائیجان ءِ نیام ءَ ھاسیں ءُ وھد ءِ آزمائش بوتگیں براتی سیادی آناں پدر کنان ءَ گوشت کہ پاکستان اے دوستی ءَ را وت مہ وتی پائدگ مندیں اقتصادی شریکداری ءِ تہ ءَ بدل کنگ ءِ واستہ سرجمی ءَ جزمیگ اِنت۔ آئی ءَ پاکستان ءِ جتا جتائیں شوبگ آنی تہ ءَ آذربائیجان ءِ نیمگ ءَ چہ 2 ارب ڈالر ءِ سرمایہ کاری ءِ تجویز آناں گڈی رنگ دیگ ءِ تہ ءَ پیشرفت ءِ سر ءَ دل یکیمی ءِ درشان کت۔ آئی ءَ صدر الہام علیوف ءَ را زوت پاکستان ءِ سرکاری تر ءُ تاب ءِ دعوت ءِ ھم نوک کت کہ صدر الہام علیوف ءَ اے دعوت من اِت۔ صدر علیوف ءَ مزن وزیر ءَ را پاکستان ءِ جوانیں کامیابی ءِ پد ءَ مبارک بات دات۔ آئی ءَ امن ءِ واستہ پاکستان ءِ کوشست آں ساڑات ءُ جنگ بندی ءِ منوگری ءَ را وش اتک کت۔ آئی ءَ یک رندے پدا گوشت کہ آذربائیجان ھمک پڑ ءَ پاکستان ءِ گوما وتی براتی سیادی ءَ را مھکم کنگ ءِ واستہ جزمیگ اِنت۔
