تہران۔ 16اپریل (اے پی پی) ایران نا وزیر خارجہ محمد جواد ظریف پارینے کہ ایران نا سیاست اقتصادی شونداری و سائنس و ٹیکنالوجی نا محور الس ئِ و داڑکن ایران آ پیشن نا دباﺅ تا ہچ ئُ زئم اس اف۔ ذرائع ابلاغ نا رداٹ ایران نا وزیر خارجہ محمد جواد ظریف تہران اٹی شیئر مارکیٹ ، بینکنگ و بیمہ نا دہ می جہانی نمائش نا بنائی دود آن تران کرسا پارے کہ الس اسہ مسلمہ حقیقت و ایران نا سیاسی ، سائنسی و اقتصادی واک انا بنداو ئِ ۔ وزیر خارجہ پارے کہ ایران عراق جنگ انا دور اٹی دشمن دفاعی سلہہ غاتسکان ایران نا رسینگ آ پابندی خلک ولے اینو ایرانی چاہندار آتا کوشست آن ایران ہندن ئُ لائخی دوئی کرینے کہ داسہ اسٹ اسے ٹی ہم ایرانی الس نا مقابلہ ئِ کننگ نا طاقت اف۔ اوپارے کہ ایران نا الس چار سال مست صدارتی گچین کاری تیٹی زیات آن زیات بشخ ہلسا دنیا غا ثابت کرے کہ او اقتصادی دباﺅ ئِ سگنگ کیک ولے سیاسی دباﺅ و منہ زوری نا مون آ گوڈ خلپک۔ یات سلے کہ تہران اٹی شیئر مارکیٹ ، بینکنگ و بیمہ نا بابت دہ می جہانی نمائش اٹی 351 ملکی و درملکی کمپنی شریک ئُ۔
