اسلام آباد۔ 27 جنوری (اے پی پی) پبلک اکاؤنٹس کمیٹی (پی اے سی ) نا دیوان پنچ شنبے نادے آ پارلیمنٹ ہاؤس اٹی پی اے سی نا چیئرمین رانا تنویر حسین نا کماشی ٹی مس۔ دیوان اٹی کمیٹی نا باسک سینیٹر طلحہ محمود، شاہدہ اخترعلی، سردار ایاز صادق، مشاہد حسین سید، شیخ روحیل اصغر، خواجہ محمد آصف، منزہ حسن تون اوار تعلقدار سرکاری ادارہ غاتا آفیسر آک بشخ ہلکر۔ دیوان اٹی وزارت ریلوائی و سمندر پار پاکستانی تا وزارت نا 2019-20نا آڈٹ اعتراض آتا جاچ ءِ ہلنگا۔ سیکرٹری ریلوائی پی اے سی ءِ پارے کہ کرتارپور ریلوائی ٹریک نا جوڑ جاڑ آ کاریم نا بناءِ کرفینن۔ چیئرمین پی اے سی پارے کہ نارووال آن لاہور اسکان ٹرین نا رفتار بھاز سست ءِ بروک آ دیوان اٹی ریلوائی دا بابت ہم تیار ی کرسا برے۔ سمندر پار پاکستانی تا وزارت نا کنڈآن ایم ڈی ڈاکٹر عامر شیخ پی اے سی ءِ اوورسیز تعلیمی ادارہ غاتا بابت حوال ترسا پاننگاکہ ننا مقابلہ بھلا نجی تعلیمی ادارہ غاتون ءِ۔ اسلامی و دیکی قدر ءِ مون آ تخسا سلیبس جوڑ کننگک۔ ننا تعلیمی ادارہ غاتا استاد آتا تنخواہ 10 درسد ودفنگ نا کمیٹی آن منظوری ءِ ہلنگانے۔ زرتس بناکرے تو اوفتے جولائی 2021 آن بقایہ جات ہم تننگک۔ اوفتا کنٹریکٹ اِراسال مریک ہراٹی میڈیکل نا آسراتی اوار مریک۔ استاد آتے سالانہ انکریمنٹ باقاعدگی اٹ لگنگ ءِ۔ اسہ سوج اسے نا ورندی ٹی اوپارے کہ ننا کل 26 ادارہ ءُ۔ چندی طالب علم آتے فیس اٹی 50 درسد رعایت ہم تننگک۔ اگہ بنجائی ملازم آتیانبار اوفتے آسودہی تننگا تو ادارہ خواتہ مریک۔ اگہ دا استاد آک اینو ہلرکار تو اوکان کم تنخواہ غا ملازم ملنگ کیک۔ نن تو دا سجفنگ اُن کہ زیات تنخواہ والا استاد آتے گولڈن شیک ہینڈ انا کمک اٹ فارغ کرسا اوفتا جاگہ غا پوسکن ءُ استاد بھرتی کین۔ شاہدہ اختر علی پارے کہ استاد آتے رکھ ملک تو او جوان ءُ تعلیم اس ایترہ۔ تعلیمی نظام نا مقابلہ ءِ عام کاروبار تون کننگپ۔
