اسلام آباد۔ 21 جنوری (اے پی پی) سینیٹ نا قائمہ کمیٹی حوالکاری و شینکاری نا چیئرمین سینیٹر فیصل جاوید پارینے کہ حکومت نا پامدار پالیسی تا سوب آن زرگزران شونداری نا کنڈآ ہِننگ ءِ ، ملازمت آتا وارخواہی تیٹی ودکی مسنے، مقصود چپراسی، غلام شبیر قریشی و اقرار حسین نا تنخواہ ہزار آ روپئی تیٹی ءُ وخت اس کہ اوفتا اکاؤنٹ آتیٹی کروڑ آ روپئیک ہنار، دا پیسہ غاک منی لانڈرنگ نا کمک اٹ شہباز شریف نا اکاؤنٹ آتیٹی ہنار۔ جمعہ نادے آ بڑزکو ایوان نا دیوان اٹی پارلیمنٹ نا اسیجائی دیوان آن صدر مملکت نا تران آ منت واری نا تحریک آ گپ وتران کرسا سینیٹر فیصل جاوید پارے کہ صدر مملکت ڈاکٹر عارف علوی ایوان نا اسیجائی دیوان آن تران اٹی اِرا بشخ آتا ہیت ءِ کرے، اسٹ اینو نا پاکستان ءِ و اسٹ درونا پاکستان ئس، اسٹ 2018 ء آن مست انا پاکستان ئس و اسٹ اینو 2022ء نا پاکستان ءِ۔ اوپارے کہ 2018ء ٹی ملک ءِ 20 ارب روپئی کرنٹ نسخان نا مون تروک ئس، جہانی بینک، بلوم برگ و اکانومسٹ نا ساڑی آ رپورٹ آتیٹی حکومتی پالیسی تا اعتراف ءِ کننگانے، ملک انا شرح نمو 5.37 درسد اسکان سرمسنے۔ اوپارے کہ کورونا نا سوب آن مچ آ دنیا نا زرگزران آ اثر تما، گچین حکومت عملی نا سوب آن پاکستان نا شرح نمو ٹی ودکی مسنے، مستین اٹ شرح نمو مصنوعی ئسک، شرح نمو ٹی ودکی آن ملازمت آتا وارخواہی ودی مریک، فی کس کٹیا تیٹی ودکی مسنے، کرنٹ اکاؤنٹ نسخان اٹی کمتی بسنے، بلومبرگ نا حساب وکتاب نا رداٹ پاکستان نا شرح نمو ودک و ملازمت آتا وارخواہی ودی مریک۔ اکانومسٹ نا رپورٹ نا رداٹ کورونا دین آن پد ہم زرگزرانی شونداری ٹی پاکستان دنیا نا ارٹ میکو نمبر ءِ و سویلی ایشیا نا اولیکو ملک ءِ۔ اوپارے کہ مارچ انا ایسر اسکان مچ آ پنجاب نا شاری تے ہیلتھ کارڈ جاری کینہ وخت اس کہ خیبرپختونخوا ٹی جاری کننگانے۔ اوپارے کہ دا ہیلتھ کارڈ اکن ہرخاہوت ءِ درمان کن سالانہ دہ لکھ روپئی ملک۔ اوپارے کہ دا فریشانی نا ہیت اسے کہ مقصود چپراسی نا اکاؤنٹ اٹی 375 کروڑ روپئی ہنا و اونا ماہانہ تنخواہ 25 ہزار روپئی ءِ، غلام شبیر قریشی و اقرارحسین نا تنخواہ ہم ہزار آ روپئی تیٹی ءُ وخت اس کہ اوفتا اکاؤنٹ آتیٹی کروڑ آ روپئی ہنا ، داپیسہ غاک منی لانڈرنگ نا کمک اٹ شہباز شریف نا اکاؤنٹ آتیٹی ہنار۔ سینیٹر قراۃ العین مری و سینیٹر طاہر بزنجو ئسک ہم شرہ ٹی بشخ ہلکر۔
