اسلام آباد۔ 21 جنوری (اے پی پی) وزیرخارجہ مخدوم شاہ محمود قریشی پارینے کہ لاہور اٹی پیش بروک آ واقعہ است ہسونی نا سوب ءِ، گڑاس امن مخالف واکدارک داڑے اسپائلرنا کڑد ءِ ادا کننگ خواہنگ ءُ، اوخواپسہ کہ پاکستان اٹی زرگزرانی سوگوی مرے۔ جمعہ نادے آ تینا اسہ بیان اسے ٹی وزیر خارجہ پارے کہ ننے خلینگ نا اسُل گرج اف ننے اوزموار آتا تدارک ءِ کروئی ءِ۔ مستین اٹ ہم ننا قوم و ننا سپاہ داواکدارآتون سختی اٹ مون تسر و اوفتے شکست تسر آخبت ہم انشاء اللہ ہنداوڑ اوفتے بوز اٹ کنوئی تمک، نن ڈیہہ ٹی امن و ایمنی نا خواہندار اُن۔ شاہ محمو د قریشی پارے کہ ننا پالیسی نئے بیرہ پاکستان بلکن مچ آ ڈیہہ نا زرگزرانی شونداری ءِ ، نن دہشت گردی نا مقابلہ ءِ پامداری اٹ کینہ دا بابت ننا نیام اٹ قومی امنائی سلاہ ساڑی ءِ ، نن اوڑآ مون آ کانہ۔ وزیرخارجہ پارے کہ مقبوضہ کشمیر نا حالیت آک نما مون آٹو، اینو برطانیہ ٹی ’’جنگی ڈوہ ‘‘ انا ذکر مننگ ءِ ، بھارت آ نسل کشی نا دوبہ لگنگ ءِ و دنیا بھارتی ظلم آ پاش آن پاش ہیت کننگ ءِ۔ اوپارے کہ او زموار آک انت اکن خوارہ کہ پاکستان اٹی امن مرے، سوگوی و زرگزرانی شونداری مرے۔ بھاز انگا دہشت گردی نا واقعہ غاتا پدرنگ ءِ پیش بننگ آن مست خلنگا و دوبہ دارآتے اوفتے اوفتا کروک نا سزا اسکان سرکننگا۔ لاہور نا واقعہ نا زمواری ہراپڑک امنا کرینے ہروئی دادے کہ اوفتا پد اٹ ہراواکداریک ءُ ، اوفتے تربیت و سلہہ ہراکان ملنگ ءِ؟ مخدوم شاہ محمود قریشی پارے کہ کلبھوشن نا کیس و انکشاف آک نما مون آٹو، نن سفارتی بابت ہرفورم آ او زموار آتا برخلاف توار بڑز کرین و اوفتے بے نقاب کرین و آخبت ہم کرسا کینہ۔ دہشت گردی نا برخلاف جامع حکمت عملی اس ساڑی ءِ اوڑآ ننے گامزن مروئی ءِ، مخدوم شاہ محمود قریشی پارے کہ اومیت کیوہ کہ اپوزیشن داوڑنا قومی وڑنا باندات آتیا ننتون تفک۔ سویلی پنجاب نا بابت وزیرخارجہ شاہ محمود قریشی پارے کہ نن سویلی پنجاب نا صوبہ ءِ عملی ءُ دروشم اس تننگ کن مون آ ہِننگ خوانہ، دا رداٹ آئینی ترمیم کن ننے 3/2گیشتری درکار ءِ، دا بابت پگہ ای شہباز شریف و بلاول بھٹو زرداری ءِ چٹھی نا کمک اٹ سلہ خلکونٹ کہ او سویلی پنجاب صوبہ نا جوڑ کننگ کن درکار آئینی ترمیم نا رداٹ ننتون تفر تانکہ سویلی پنجاب نا الس نا متکن آ خواست ایسر اسکان سرمننگ کے۔ وزیرخارجہ پارے کہ اومیت کیوہ کہ سویلی پنجاب نا مسہ نیم کروڑ الس نا فائدہ غاتے مون آ تخسا اوننا سلہ غا سنجیدہ ردعمل نا درشانی ءِ کیرہ، و ننتون کمک کیرہ۔
