اسلام آباد۔ 24 دسمبر (اے پی پی) بنجائی وزیر سائنس و ٹیکنالوجی سینیٹر شبلی فراز پارینے کہ ملک بیرہ ٹیکسٹائل نا برآمد آتیا مون آ ہِننگ کپک، ایلو مصنوعات آتا برآمد آتے ہم ودفوئی مریک، پاکستان ءِ جہانی حلال فوڈ مارکیٹ اٹ پدریسہ تینا بشخ ءِ دوئی کروئی مریک، دا مسخت کن سفارتی کہول آہم کوشست آتا گرج ءِ، ننے تینا الس ءِ ہم آب اٹ مصنوعات تروئی مریک،۔ داخیال آتا درشانی ءِ او جمعہ نادے آ پاکستانی حلال مصنوعات آتے جہانی کہول آ قابل قبول کننگ کن پاکستان حلال اتھارٹی نا ضابطہ و کڑد انا بارواٹ اڈ ہلوک دود آن تران کرساکرے۔ وزارت سائنس و ٹیکنالوجی نا ذیلی ادارہ پاکستان حلال اتھارٹی نا کنڈآن دود اٹی بنجائی وزیر سائنس وٹیکنالوجی آن بیدس پاکستان حلال فوڈ اتھارٹی نا ڈائریکٹر جنرل اختر احمد بوگیو، وزارت سائنس و ٹیکنالوجی نا ایڈیشنل سیکرٹری ڈاکٹر عطاء الرحمان ، پاکستان سائنس فاؤنڈیشن نا چیئرمین ڈاکٹر شاہد بیگ، وزارت نا ایلو ادارہ غاتا سینئر کمامدار و حلال فوڈ انڈسٹری تون وابستہ شخصیت آک بشخ ہلکر۔ بنجائی وزیر پارے کہ حلال فوڈ مارکیٹ اٹی پاکستان ءِ تینا بشخ ءِ دوئی کننگ ءِ، دامسخت کن ننے ہدف آتے مقرر و اوفتا مانیٹرنگ ءِ کروئی مریک۔ اوحلال فوڈ اتھارٹی نا جوڑ کننگ ءِ اسہ اہم ءُ پیش رفت اس گوندسا پارے کہ پاکستان حلال اتھارٹی 2016 ء ٹی جوڑ مس ولے دا ادارہ غیر فعال ئس، پاکستان اسلامی دنیا ٹی اہم ءُ ہند اس تخک، حلال و حرام قوت آک مدام اسہ ایلو تون مون تننگ ءُ، ننا کوشست ءِ کہ دا ادارہ کانودی وڑاٹ جوڑ مننگ آن پد داسہ عملی وڑاٹ ہم گام گیج کے۔ سینیٹر شبلی فراز پارے کہ وزیراعظم آن داہیت ءِ ہیل کرینن کہ ہراتم نا نیت سہی ءِ تو مون آ ہِننگ کیسہ، وزارت سائنس و ٹیکنالوجی سرسہبی نا کنڈآ سفر نا بناءِ کرینے، راجی و اقتصادی شونداری ٹی وزارت نا اہم ءُ کڑد اسے، ولے دانا بنداوی وت پاکستان نا الس نا راجی آسراتی بایدے مرے۔ اوپارے کہ ننا است خواہی ءِ کہ وزارت سائنس و ٹیکنالوجی ملک انا زرگزرانی شونداری ٹی تینا کڑد ءِ اداکے، ننے عزم اتون دا سفر اٹ چلینگوئی ءِ و قائدانہ کڑد ادا کروئی ءِ، ننتون وسیلہ ارے و اسلامی ملک آتیٹی لیڈرشپ انا کڑد ءِ ادا کننگ نا ءِ۔ بنجائی وزیر پارے کہ ننے عملی وڑاٹ عزم تون کاریم کروئی ءِ و دابارواٹ مخلوق ءِ آگاہی تروئی ءِ۔ داوخت آ پاکستان حلال فوڈ اتھارٹی نا ڈائریکٹر جنرل اختر احمد بوگیو تران کرسا پارے کہ اونا ادارہ 2016ء ٹی پارلیمنٹ نا ایکٹ نا رداٹ جوڑ کننگا ہرانا مسخت حلال مصنوعات آتا درآمد و برآمد نا مانیٹرنگ کننگ ءِ۔ اوپارے کہ ادارہ ءِ فعال و گچین کننگ کن اودے بنجائی وزیر سائنس و ٹیکنالوجی نا پورو تائید ومخ تفی دوئی ءِ، ادارہ ءِ چلیفنگ کن قاعدہ و ضابطہ جوڑ کننگانے وخت اس کہ چندی ملک آتون مفاہمت نا یات داشت آتیا ہم دستخط کننگانے۔
