اسلام آباد۔ 12اپریل (اے پی پی) چین پاکستان اقتصادی راہداری ڈٹ پاکستان ئِ دنیا نا پسند انگا ملک جوڑ کرینے، پاکستان 2025ءٹی دنیا نا گچین و 2047 ءٹی 10 بھلا معیشت آتیٹی اوار مریک، ساڑی حکومت نا گام گیج آتیان ملک ترندی اٹ شونداری کننگ ئِ ، دنیا نا ہرمستند جریدہ پاکستان ئِ مون آ بروک آ معیشت گوندنگ ئِ ۔ چارشنبے نادے وزارت ڈٹ بندی و شونداری نا کمامدارآک اے پی پی ئِ پاریر کہ سی پیک پاکستان ئِ دنیا نا پسندیدہ انگا ملک جوڑ کرینے، پاکستان اسٹاک ایکسچینج ئِ ایشیا نا گچین اسٹاک ایکسچینج گوندنگ انگ ئِ، ملکی زرمبادلہ ناکوڑی ٹی مسہ گناودکی مسنے۔ اوپاریرکہ پاکستان چین اتون اقتصادی راہداری نا تغئِ پورو کننگ تون اوار اوار تینا ورنااستاد آتا بڑزکو تعلیمی قابلیت آتا پوروی کن امریکہ تون علمی راہداری قائم کرسا 10 ہزار استاد آتا امریکی یونیورسٹی تیٹی بڑزکو تعلیم و تربیت نا بست و بند ئِ کننگ ئِ۔ انسانی و افرادی زرکاری نا داخہ بھلا تغ ئِ مہالو اصل خننگ تنے۔ اوفک پاریر کہ سی پیک ڈٹ دنیا ٹی جاری غٹ آن بھلا شونداری ڈٹ ئِ ، 55 ارب ڈالر مالیت آن زیات نا پاک چین اقتصادی راہداری ڈٹ پاکستان ئِ ترند رفتار اقتصادی شونداری نا شاہراہ غا دیک۔ مریس، کشادہ و رکھوک روڈ، توانائی نا ڈٹ، انڈسٹریل پارکس و گوادر بندرگاہ نا ڈٹ، ہرافتا پوروی دہشت گردی نا برخلاف جنگ آن زہمی پاکستان کن روشنا آخبت نا روشنائی ئِ۔ اوپاریر کہ سی پیک نا گونڈ وختی ڈٹ 2017-18ءوخت اس کہ مریس وختی ڈٹ 2020ءآن2030 ءاسکان پورو مریک۔
