اسلام آباد۔ 09 دسمبر (اے پی پی) وزیراعظم عمران خان پارینے کہ دنیا اوغان الس نا مشکل آتا احساس ءِ کے، اوغانستان ءِ انسانی تنکی آن بچفنگ نا گرج ءِ، بھارت توفک نا زور، واک انا کاریم اٹ اتنگ و ظلم انا کمک اٹ کشمیری تے توننگ کپک، آر ایس ایس نا مننگ تون بھارت ءِ پیشن نا دشمن اسے نا گرج اف، مہالو ہم سرد جنگ آن دنیا ءِ بھاز نسخان مس پاکستان داسہ ہچ ءُ بلاک اسے نا بشخ مفک، دنیا ٹی واپاری فائدہ موسمیاتی بدلی نا اثرآتون مون تننگ کن درکار گام گیج آتا کسر اٹ اڑاند ءِ، ننے پٹ وپول نا مون آ دننگ و تھنک ٹینکس نا کمک اٹ ہندن ءُ امنائی بیانیہ اس مون آ اتوئی مریک ہرا ننا قوم انا ترجمانی ءِ کے۔ داخیال آتا درشانی ءِ او پنچ شنبے نادے آ داڑے انسٹی ٹیوٹ آف سٹریٹجک سٹڈیز اٹ’’اسہ پرامن و شونہال سویلی ایشیا‘‘ نا سرحال آ کانفرنس نا بنائی سیشن آن تران کرسا کرے۔ وزیراعظم ڈیہہ خاص وڑاٹ اوغانستان نا حالیت آتا ذکر ءِ کرسا پارے کہ اوغانستان نا حالیت آتا ننے بھاز فکر ءِ ، ہموڑے خانہ جنگی نا گڑتی ئس۔ سویت جنگ اٹ 2 لکھ اوغان شاری زوال کریسر۔ پاکستان ءِ ہم پناہ گزین آتا بھاریم ءِ سگوئی تماسس۔ اوغانستان اٹی داوار بھسکاری ناگڑتی ئس ولے خوش بختی اٹ داوڑ متو۔ اوغانستان ءِ انسانی تنکی آن بچفوئی مریک۔ اوغانستان نا میرات آک منجمد ءُ۔ اوفتا بینکاری نظام ژند مسنے، اونا اثرآک اوغان الس آ تمرہ۔ اوپارے کہ او آئی سی نا وزراء خارجہ نا بروک آ ہفتہ دیوان مننگ ءِ، پاکستان پورو کوشست کننگ ءِ کہ دنیا ءِ پائے کہ او طالبان تے پسند کے یا کپ ، 4 کروڑ اوغان الس نا احساس ءِ کے و دا سمجھنگے کہ اگہ ہنداخالیت مس تو اوفتیا انت گدرینگک۔ امریکہءِ ہم دا پہہ مرے کہ اوغانستان نا میرات آتے منجمد کننگ و اوفتا زرگزران نا کم مننگ آن انسانی تنکی ودی مس تو اونا نسخان غٹ ءِ مریک وپاکستان غٹ آن زیات زہمی مریک۔ ایران اٹی ہم داوخت آ پناہ گزین تا بھلو ویل اسے۔ یورپ ءِ ہم پناہ گزین تا سوب آن ویل مون تروک ءِ۔ اوغانستان نا الس 40 سال آن ہروڑنا مشکل آتون مون تننگ ءِ۔ پاکستان اوفتا مشکل آتے کم کننگ کن تینا پبی کڑد ءِ ادا کیک۔ اوغانستان اٹی امن ننا آخبت کن بھاز اہم ءِ۔ نیامی ایشیانا ملک آتون ننا رابطہ ءِ و نیامی ایشیا نا غٹ ملک آک گوادر نا کسر واپار ءِ مون آ دننگ خوارہ۔ دا چرجوئی ٹی ننا معاہدہ ہم مسنے۔ اسہ ایلو تون تین پہ تینی رابطہ کن اوغانستان اٹ امن نا سخت گرج ءِ۔ وزیراعظم پارے کہ سی پیک پاکستان کن اسہ بھلو موقع اسے۔ داڑآن نن فائدہ ہرفنگ اُن۔ اوپارے کہ داوخت آ حالیت آک سرد جنگ انا کنڈآ ہِننگ ءُ و بلاکس جوڑ مننگ ءُ، پاکستان دا بلاکس جوڑ مننگ ءِ توننگ نا پورو کوشست کے و نن ہچ ءُ بلاک اسے نا بشخ مفن۔ مہالو ہم سرد جنگ آن دنیا ءِ بھاز نسخان مس۔ پاکستان خواپک کہ نن تدوک آ وارآنبار داوار ہم سرد جنگ انا گواچی مرین۔ ایران و سعودی عرب نا نیام اٹ جھیڑہ نا ایسری کن ہم پاکستان تینا پبی کڑد ءِ ادا کرے ہرانا ہڑتوم آ ملک آک ستاءِ کریر۔ وزیراعظم پارے کہ امریکہ و چین نا نیام اٹ سرد جنگ انا بابت فاصلہ ودنگ ءِ و ننا کوشست ءِ کہ دا ودوک آ فاصلہ غاتے کم کین۔ واپار اٹی مقابلہ دنیا ٹی مدام مسنے ولے نن خوانہ حالیت آک داکنڈآ ہنپس ہراوڑ سوویت یونین، امریکہ و دیکی ملک آتا نیام اٹ مسنو۔ وزیراعظم پارے کہ سویلی ایشیا ٹی غٹ آن بھلا ویل کشمیر ءِ ہراڑآ نن بھارت تون گپ وتران نا پوروکوشست کرین، نریندر مودی ءِ ٹیل فون ہم کرین ولے او پاکستان نا کنڈآن امن نا است خواہی ءِ نزوری تکا۔ وزیراعظم پارے کہ بھارت اٹ آر ایس ایس نا نظریہ تخوک آ حکومت ءِ و اسہ اسہ نظریہ سے تون ننا مقابلہ ءِ ہنداخاطرآن مشکل ءِ کہ او نن تون ہیت وگپ کے۔ ہرا بھارت اٹ مننگ ءِ او کشمیری ہی آخا بلکن بھارت نا الس کن خراب مننگ ءِ و داہندوستان نا مخلوق نا ہم بدبختی ءِ۔ بھارت اٹی 50 آن 60 کروڑ بندغ آتے ایلو درجہ نا شاری تکنگ انگ ءِ۔ انسانی تاریخ اٹ اسُل داوڑ متنے کہ داخہ بھلا آبادی ءِ ایلو درجہ نا شاری تکنگے۔ اونا بھارت نا راج اکن ہم بھلو اثراس مرتب مریک۔ بھارت اٹ آرایس ایس نا نظریہ پائیدار اف، آر ایس ایس نا مننگ تون بھارت ءِ پین پیشن نا دشمن اسے نا گرج اف، آر ایس ایس بھارت اٹ بشخنگ نا نظریہ ءِ تسنے۔ وزیراعظم پارے کہ ننا حکومت موسمیاتی بدلی تا اثرآتون مون تننگ کن بھاز گچین کاریم کرینے۔ 2013ٹی خیبرپختونخوا ٹی بلین ٹری سونامی ڈٹ انا بناءِ کننگا۔ ہمالیہ نا گلیشیئرز قراقرم نا گلیشیئرز آن زیات ترندی اٹ دیر مننگ ءِ۔ مستین اٹ پاکستان اٹ دا ویل ءِ سنجیدگی اٹ ہلنگتو۔ پاکستان موسمیاتی بدلی نا اثرآتیان غٹ آن زیات زہمی 10 ملک آتیٹی اوار ءِ۔ بھارت ہم داڑآن بھاز زہمی مننگ ءِ۔ پاکستان و بھارت ہڑتوم آ ک اواری اٹ موسمیاتی بدلی نا اثرآتون مون تننگ کن گام گیج کیر۔ موسمیاتی بدلی نا اثرآتون مون تننگ کن جہانی راہشون تیٹی سنجیدگی نظر بفننگ ءِ، دنیا ٹی واپاری فائدہ موسمیاتی بدلی نا اثرآتون مون تننگ کن درکار گام گیج آتا کسر اٹ اڑاند اسے۔ پاکستان نا چاگڑد کن مضر گیس آتا پیش تمنگ اٹ بشخ بھاز کم ءِ، بھارت بجلی نا بھاز زیات پیدوار کولاآن دوئی کننگ ءِ۔ موسمیاتی بدلی نا منفی اثرآتا سنگین نتیجہ مون آ بننگ ءِ۔ پاکستان داتم اسکان دا بابت انت کہ گام گیج اس کرینے اوفتا مچ آ دنیا ٹی ستاءِ کننگانے۔ ننا ڈیہہ ٹی سیاسی اختلاف آتا سوب آن واپار ہم کم ءِ و موسمیاتی بدلی نا اثرآتا بابت ہم نن اسہ ایلو تون گنڈوک اُن۔ وزیراعظم پارے کہ ملک اٹی انسٹی ٹیوٹ آف سٹریٹجک سٹڈیز آنبار نا تھنک ٹینکس انا بھاز گرج ءِ ، 1960 نا دہائی ٹی اسہ بڑزکو آب انا ڈٹ بندی کمیشن اسے نا رداٹ ملک اٹی غٹ آن زیات اقتصادی شونداری مس و ملائیشیا کون آ ملک آک پاکستان ءِ تیکن رول ماڈل اس تکارہ ولے داکان پد دا رداٹ ننا لائخی کم مرسا کرے۔ وزیراعظم پارے کہ نن خوانہ کہ نن اسہ سجفوک ءُ موقف اس دنیا نا مون آ پیش کین۔ پاکستان اسلام نا پن آ جوڑ مسنے و اسلام نا حقیقت انتءِ، اودے دنیا نا مون آ سہی وڑاٹ تالان کننگ کن ننے تھنک ٹینکس نا گرج ءِ۔ ساڑی حکومت رحمت اللعالمین صلی اللہ علیہ و آلہ وسلم اتھارٹی اس جوڑ کرے ہرانا رداٹ اسلام کن گچین کاریم مننگ ءِ اوپارے کہ امن و شونہالی نا اسہ ایلو تون بھلو تعلق اسے، ہرا جنگ آتے اٹ ویل آتے ایسر کننگ نا کوشست کیک اودے تاریخ نا معلوم مفک اونا اندازہ غاک غلط مریرہ۔ جنگ آتے اٹ ویل آتے ایسر کننگ نا است خواہی تخوک آک تینا سلہہ غاتا سوب آن تکبر اٹ اختہ مریرہ۔ او انسانیت کن سجفپسہ، اوغانستان و ننا حالیت غٹ انا مون آٹے۔ اوغانستان اٹی جنگ انا سوب آن مشکل غٹ انا مون آٹے۔ آخیریکو وخت اسکان پورو کوشست کننگے کہ ویل ہیت و گپ اٹ ہی ایسر مرے۔ بنائی سیشن آن وزیرخارجہ شاہ محمود قریشی ہم تران کرے۔
