نیویارک۔ 11اپریل (اے پی پی) اقوام متحدہ ٹی پاکستان نا آخبتی مندوب ڈاکٹر ملیحہ لودھی پارینے کہ پاکستان نا الس تینا جیرت و ثابت گامی آن بے سگی نا ہموواک آتے شکست تسنے ہرا بیدادی نا کمک اٹ تینا نظریہ غاتے ایلو فتیا مسلط کننگ نا خواہندار ئسر۔ اوداہیت ئِ نوبل انعام یافتہ پاکستانی ملالہ یوسف زئی ئِ اقوام متحدہ نا کنڈآن ”امن نا سفیر“ نا اعزاز تننگ آ اسہ بیابخیری دود اسے آن تینا تران اٹی پارے۔ اوپارے کہ ہراوڑ ملالہ انتہاپسندی تون مون تس بالکل ہنداوڑ ننا الس ہمیشہ ہمو عنصر آتے مسترد کرسا کیک ہرا بابائے قوم نا اسہ جدید ، روادار و شونداری پسند پاکستان نا ویژن ئِ چیلنج کننگ نا کوشست کیرہ ۔ ڈاکٹر ملیحہ لودھی اقوام متحدہ نا کنڈآن ملالہ یوسف زئی نا بطور سفیر امن تقرری نا گام انا ستائِ کرسا پارے کہ ملالہ بہادری و مدافعت نا استعارہ اسے، او مچ آ دنیا ٹی ورناخلقت کن تحریک اس جوڑ مسنے و اونا دا پوسکن آ کڑد جہانی امن و ایلمی کن مشعل راہ جوڑ مریک و اواسہ رول ماڈل اسے نا وڑاٹ چاہنگسا مریک۔ اوپارے کہ دا بہادر پاکستانی الس نا خصوصیت ئِ کہ او بے سگ انا سیاہ واک آتے شکست تننگ کن کمر بند و چوکس ئُ۔ ملیحہ لودھی تعلیم نا مون آ دننگ کن ملالہ یوسف زئی نا کوشست آتا ذکرئِ کرسا پارے کہ ملالہ ئِ سم لگسا ثابت کرے کہ مسن تا تعلیم اوفتا بنداوی و پیدائشی حق ئِ و دابارواٹی ہچئُ بندش اسے آ ہیت مننگ کپک۔ اوپارے کہ مسن تا تعلیم اولیت آتیٹی بایدے اوار مرے انتئے کہ نیاڑی ئِ وت واجہ جوڑ کننگ نا ہندا یخینی کسرئِ۔ اوپارے کہ تینا نصف ئِ پدی ہلسا ننے آن ہچ گہس مون آ ہِننگ کپک۔
