اسلام آباد ۔ 11 اپریل (اے پی پی) صدر مملکت ممنون حسین پارینے کہ پاکستان بیلاروس ئِ ڈیہہ نا اسہ اہم ئُ ملک اس تکک و ہڑتوم آ ملک آتا فائدہ ٹی چندی بشخ آتیٹی تین پہ تینی تعلقداری تے پین مون آ دننگ نا خواہندار ئِ۔ پاک چین اقتصادی راہداری ڈٹ اٹی اوار مننگ کن بیلاروس نا خواہش خوش آئند ئِ۔ اومیت ئِ کہ داڑآن ڈیہہ ٹی شونداری نا رفتار ترند مریک۔ اوداہیت ئِ جمہوریہ ، بیلاروس نا قومی اسمبلی نا ایوانِ نمائندہ غاتا چیئرمین ولادی میر اینڈری چینکو تون ہیت وگپ کرسا پارے ہراک ڈل اتون اوار سے شنبے نا دے ایوان صدر اٹی اوڑتون اوڑدہی کریر۔ قومی اسمبلی نا اسپیکر سردار ایاز صادق، قائمہ کمیٹی خارجہ امور نا چیئرمین سردار اویس احمد لغاری و سینئر کمامدارآک ہم داوخت آ ساڑی ئسر۔ صدر مملکت پاکستان تون ہڑتوم آ کنڈآتا تعلقداری تا مون آ دننگ کن بیلاروس نا سیاسی سروک آتا کوشست آتا ستائِ کرسا اومیت ظاہر کرے کہ داسال اگست اٹی بیلاروس نا وزیراعظم نا گمانی دورہ ہڑتوم آ ملک آتا تین پہ تینی تعلقداری تے پین سوگوی تننگ اٹی کمکار مریک۔ اوپارے کہ ہڑتوم آ ملک آتا نیام اٹ اقتصادی و سیاسی بشخ آتیٹی مثبت پیش ہائے رفت ہڑتوم آ کنڈآتا کمکاری کن سوگو بنداو فراوان کرینے۔ اوپارے کہ بڑزکو کہول آ و پارلیمانی ڈل آتا دورہ غاتا باقاعدہ درشانی پاکستان و بیلاروس انا نیام اٹ ودوک آ شریداری نا عکاس ئِ۔ اوداہیت ئِ تالان کرے کہ ہڑتوم آ ملک آتا نیام اٹ کشت وکشار، ادویہ سازی، ہلکا مشینری نا تیاری، تیل و گیس انا بشخ آتیٹی تین پہ تینی کمکاری نا بھلو گمان اس ساڑی ئِ۔ صدر ممنون حسین پارے کہ پاکستان نیو کلیئر سپلائر گروپ نا رکنیت کن بیلاروس نا مخ تفی ئِ ہم بھاز قدر انا نظر اٹ ہرک۔ اوپارے کہ جہانی کہول آ ہڑتوم آ ملک آتا نیام اٹ تین پہ تینی اشتراک کار بھاز زیات اہمیت تخک۔ او یونیورسل پوسٹل یونین نا انتظامی کونسل اٹی نشست کن پاکستان نا اومیت دار آتا مخ تفی آ بیلاروس نا منت واری ئِ ادا کرے۔ صدر دفاع و تربیت نا بشخ اٹی ہڑتوم آ ملک آتا نیام اٹ کمکاری ئِ ودفنگ آ ہم زور شاغا۔ صدر ممنون حسین پارے کہ بیلاروس یونیورسٹی ٹی اردو چیئر و پاکستان اٹی بیلاروسی چیئر نا اڈتننگ، تعلیم و دودوربیدہ نا پٹ اٹی سرسہب اڈتننگ آ مبارکباد ترسا اومیت ظاہر کرے کہ داڑآن ملک اٹی جمہوریت ئِ پین سوگوی ملک، داوخت آہیت وگپ کرسا ولادی میر اینڈ ری چینکو پارے کہ اونا ملک پاکستان تون ہڑتوم آ کنڈآتا تعلقداری تا مون آ دننگ نا خواہندار ئِ۔ اوہڑتوم آ ملک آتا تین پہ تینی فائدہ ٹی چندی بشخ آتیٹی اسیجائی ڈٹ بناءکننگ آ زور شاغا۔ اوپارے کہ بیلاروس نا ادویہ ساز بشخ اٹی زرکاری نا بھلو گمان اس ساڑی ئِ۔ اوپاکستانی ادویہ ساز کمپنی تے دوئی وارخواہی تیان فائدہ ہرفنگ نا سلہ خلک تانکہ اوفتا مہارت آن فائدہ ہرفنگ مرے۔ اوپارے کہ داوخت 50 پاکستانی طالب علم بیلاروس اٹی خواننگ ئُ۔ اوالسی رابطہ غاتیٹی ودکی کن ہڑتوم آ ملک آتا نیام اٹ تعلیم و دودوربیدہ نا پٹ اٹی کمکاری ئِ ودفنگ نا گرج ئِ ہم تالان کرے۔ اوپارے کہ ہڑتوم آ ملک آتے تینا راہشون تا وژن نا روشنی ٹی تین پہ تینی واپار ئِ مون آ دننگ کن بایدے اواری اٹ کاریم کیر۔ اوبیلاروس نا صدر و الس نا کنڈآن پاکستان نا حکومت و الس کن نیک است خواہی ہم سرکرے۔ صدر مملکت ہم پاکستان نا حکومت و الس نا کنڈآن بیلاروس نا صدر، حکومت و الس کن نیک است خواہی تا درشانی ئِ کرے۔
