اسلام آباد۔ 06 دسمبر (اے پی پی) سینیٹ نا قائمہ کمیٹی خزانہ سیالکوٹ نا اسہ فیکٹری اسے ٹی پیش بروک آ واقعہ نا برخلاف مذمتی قرارداد ءِ امنائی وڑاٹ منظور کرینے وخت اس کہ سینیٹ اٹی قائد ایوان سینیٹر ڈاکٹر شہزاد وسیم پارینے کہ شدت پسندی نا اواری اٹ مقابلہ ءِ کروئی مریک۔ سینیٹ سیکرٹریٹ نا کنڈآن جاری بیان نا رداٹ سینیٹ نا قائمہ کمیٹی خزانہ نا دیوان اٹی باسک آک امنائی وڑاٹ سیالکوٹ واقعہ نا برخلاف قرارداد انا منظوری ءِ تسر۔ قرارداد نا متن اٹی پاننگانے کہ کمیٹی غیر مشروط وڑاٹ سیالکوٹ نا فیکٹری ٹی سری لنکا غان تعلق تخوک آ فیکٹری منیجر49 سالہ پریانتھاکمارا دیاوندانگے نا مچی نا دوتے اٹ وحشیانہ خون و بیدادی نا مذمت ءِ کیک و حکومت آ زور شاغک کہ اسلام و انسانیت نا برخلاف دابھلا ڈوہ انا مرتکب بندغ و کمکارآتا برخلاف دمدستی و بے مٹ ایکشن ہلے۔ کمیٹی غٹ مکتبہ فکر انا عالم دین تتون اواری اٹ اسلام و پیغمبر اسلام صلی اللہ علیہ و آلہ وسلم نا پن ءِ کاریم اٹ اتسا پین انسان اسے نا برخلاف داناقابل معافی ڈوہ انا مذمت ءِ کیک۔ کمیٹی باورکرفک کہ پاکستان امن و سگ انا داعی ءِ و مچ آ قوم زہمی خاہوت و سری لنکا نا ایڑھ و ایلم تتون تفوک ءِ۔ داواقعہ نا بابت انصاف نا خواست آتے پورو کننگک۔ قرارداد اٹی سری لنکا نا منیجر ءِ بچفنگ نا کوشست کروک آ ملک عدنان و ایلو بندغ آتا نرزوری و شجاعت نا ستاءِ کننگانے ہرافک تینا جان تے خطرہ ٹی شاغسا مقتول ءِ مشتعل مچی آن بچفنگ نا کوشست کریر، دابندغ آک پاکستان و پاکستانی تا حقی تشخص نا درشانی ءِ کرینو۔ کمیٹی دا عزم انا درشانی ءِ کرینے کہ پاکستان تینا گل زمین ءِ داوڑنا بیدادی، خار و انتہاپسندی کن کاریم اٹ اتنگ نا موکل تفک۔ قرارداد اٹی پاننگانے کہ واک انا کاریم اٹ اتنگ ریاست نا حق ءِ و پین اسٹ ءِ کانود ءِ دوٹی ہلنگ نا اختیار دوئی اف۔ قرارداد اٹی ریاست نا غٹ تمبہ و عالم دین تیا زور شاغنگاکہ او انتہاپسندی نا نوٹس ءِ ہلیر ہرانا اسلام و پاکستان اٹ ہچ ءُ گنجائشت اس اف۔ راج آن داوڑنا سوچ انا چٹفنگ کن تعلیم اٹ آسراتی فراوان کننگے۔ قرارداد اٹ خار تس نظریہ غاتا پرچار (ہیٹ سپیجز)، خار و بیددی نا چٹفنگ کن قومی امنائی سلاہ نا گرج آ زور شاغنگانے۔ قرارداد اٹی ذاتی و سیاسی مسخت آتے کن کانود نا غلط کاریم اٹ اتنگ ءِ توننگ کن پارلیمان آن تینا کڑد ءِ ادا کننگ نا خواست کننگانے۔ داکان بیدس سینیٹ اٹ قائد ایوان سینیٹر ڈاکٹر شہزاد وسیم دیوان اٹ پارے کہ سیالکوٹ نا واقعہ ننا خن تے ملنگ کن کافی ءِ، ننے شدت پسندی نا مقابلہ ءِ کروئی مریک۔ اوپارے کہ داہیت انا خوشی ءِ کہ غٹ پارٹیک دا ویل آ اسٹ ءُ داوڑنا واقعہ غاتا توننگ کن انتظامیہ غان غفلت مسنے تو ایکشن ہلنگک۔ اوپارے کہ کانود نا ساڑی گری ٹی کس اسے حق مفک کہ او تینٹ فیصلہ کے۔ داکانود ءِ پین گچین کننگ نا گرج ءِ۔ تانکہ دادے غلط کاریم اٹ اتنگپ۔ اوپارے کہ شدت پسندی ہرا ننا رویہ غاتیٹی بسنے اودے چٹفوئی مریک۔
