اسلام آباد۔ 06 دسمبر (اے پی پی) وزیرخارجہ مخدوم شاہ محمود قریشی ، بیلجیم نا نائب وزیراعظم و وزیرخارجہ صوفی ولیمز نا سلہ غا دوشنبے نادے آ ڈل اتون اوار برسلز نا مسہ دے ئی سرکاری دورہ غا روانہ مس۔ برسلز اٹ تینا اڈکننگ اٹ وزیرخارجہ یورپی یونین نا خارجہ امور نا سروک و نائب صدر جوزف بوریل تون اوار، ششمیکو’’پاکستان۔ای یو اسٹریٹجک ڈائیلات‘‘ نا اسیجائی کماشی ءِ کیک۔ جون 2019اٹی، پاکستان و یورپی یونین نا نیام اٹ اسٹریٹجک انگیجمنٹ پلان آ دستخط مس، داتاریخی ’’اسٹریٹجک انگیجمنٹ پلان‘‘ آ دستخط مننگ آن پد دا ’’اسٹریٹجک ڈائیلاگ‘‘ نا اولیکو بالمشافہ دیوان مریک۔ وزیرخارجہ، نیٹو ہیڈکوارٹر آ کاہک و نیٹو نا سیکرٹری جنرل ’’جینز اسٹولٹن برگ’’اتون ہم اوڑدہی و بیلجیم نا پارلیمنٹ آن تعلق تخوک آ، یورپی پارلیمنٹ نا باسک آتون اوڑدہی و گپ وتران کیک۔ بیلجیم و لکسمبرگ اٹ رہینگوک آ پاکستانی کمیونٹی تون اوڑدہی و تران ہم وزیرخارجہ نا شیڈول اٹی ارے۔ وزیرخارجہ پارے کہ پاکستان و بیلجیم نا نیام اٹ جمہوریت، تین پہ تینی شرف کون آ اسیجائی قدر آ مبنی، دوستانہ تعلقداری ءِ۔ تدوک آ منہ سال اٹی ، ننا ہڑتوم آ کنڈآتا سیاسی، اقتصادی، واپاری، دودوربیدگی، تعلیمی و السی رابطہ غاتے ٹی ودکی مسنے، 982 ملین امریکی ڈالر نا واپاری کچ اتون بیلجیم یورپی یونین اٹ پاکستان نا پنچ میکو بھلا واپاری شریدار ءِ۔ شاہ محمود قریشی پارے کہ ننا ہڑتوم آ کنڈآتا واپار نا ساڑی آ کچ 10.883 بلین امریکی ڈالر ءِ۔ ننا نیام اٹ بڑزکو کہولی رابطہ غاتا مون آ دننگ آن، ہڑتوم آ کنڈآتا تعلقداری پین سوگو و ودک ۔
